Дьокуускайга Өлүөнэ муостатын тутууга анаммыт тимир конструкция 80%-на кэллэ

Коффердамнарга анаммыт тимир конструкциялары аҕалыы түмүктэнэн эрэр – бүгүҥҥү туругунан 80% аҕалылынна. Конструкциялары Тюменнааҕы «Стальмост» собуоттан аҕалаллар. Дьокуускайга 2,5 тыһ. туонна таһаҕас кэллэ диэн «ВИС» бөлөх иһитиннэрэр. Бу туһунан СӨ баһылыгын уонна Бырабыыталыстыбатын пресс-сулууспата иһитиннэрэр.

Өлүөнэ эбэ хаҥас өттүгэр Тамма үрэх сүнньүн уларытыы үлэтэ түмүктэнэн эрэр. 92 тыһыынча м3 сир хаһылынна уонна 90 тыһыынчаттан тахса м3 буор кутулунна, онон былааннаммыт кээмэйтэн 80% кэриҥэ үлэ оҥоһулунна.

Ону кытта тэҥҥэ, өрүс икки кытылыгар баар икки технологическай учаастакка муоста атахтарыгар аналлаах тимир арматура каркааһа оҥоһуллар. Билигин бу каркастартан 73-һэ туруорарга бэлэм, бетон кутуллуон иннинэ хаһыллыбыт дьөлөҕөстөргө түһэриллиэхтэрэ.

2024 сыл алтынньы 17 күнүттэн Өлүөнэ өрүс хаҥас кытылыгар муоста атахтарын туруорууга үлэ барар. Үлэ салгын температурата -37°С-тан аллараа түстэҕинэ эрэ тохтуур. Бүгүҥҥү туругунан, икки муоста тирэхтэрин атахтарын олохторо толору тутуллан бүппүттэр, өссө биир тирэххэ 18 атах тутуута бара турар, олортон 10-на бүтэн эрэр. Үлэ саҕаланыаҕыттан 63 атах турар сирин тетоннаатылар.

Кулун тутар ыйтан өрүс хаҥас кытылыгар баар технологическай учаастакка үс коффердамы таҥыы саҕаланыаҕа, ону өрүс сүнньүгэр уста сылдьар ньыманы туһанан туруоруохтара. Ол иһигэр, кураанах сиргэ үүттээһин уонна атахтар турар олохторун туруоруу үлэтэ ыытыллыаҕа.

Билигин «ВИС» бөлөх 150-ча үлэһитэ үлэлии-хамсыы сылдьар, олортон түөрт гыммыт үһэ олохтоох бэдэрээтчит тэрилтэ үлэһиттэрэ. Үлэ саамай үгэнигэр үлэһит ахсаана 1,5-2 тыһыынча киһиэхэ тиийиэн сөп диэн бэлиэтииллэр.