Дьокуускайга “Эмчит, үтүө киэһэнэн!” аахсыйаны ыытыахтара

Дьокуускай куоракка “Эмчит, үтүө киэһэнэн!” диэн аан бастакытын ураты аахсыйаны ыытыахтара диэн СӨ Доруобуйатын харыстабылын министиэристибэтин пресс-сулууспата суруйар. Бу туох аахсыйаный?

Үлэлиир, иллэҥ бириэмэтэ кырыымчык дьоҥҥо бэрт табыгастаах аахсыйаны толкуйдаабыттар. Ол курдук, Дьокуускай куорат олохтоохторо үлэ бириэмэтин кэнниттэн – киэһэ 18.00-22.00 чааска мэдиссиинэ көрүүтүн ааһар, быраастарга көрдөрүнэр уонна анаалыстар туттарар кыахтаныахтара. Аахсыйаны атырдьах ыйын 9-15 күннэригэр ыытыахтара.

Саха сирин олохтоохторо куорат уопсастыбаннай болуоссаттарыгар терапевт быраастарга, “узкай” исписэлиистэргэ көрдөрүнүөхтэрэ, ону тэҥэ, мэдэссиинэ көрүүтүн уонна диспансеризацияны ааһыахтара. Маны таһынан, онкологическай диспансер, тирии быраастара көрүөхтэрэ, ВИЧ, гепатит анаалыстарын ылыахтара.

Балыыһа пууннара маннык сирдэринэн көрүөхтэрэ:

— 1-кы нүөмэрдээх поликлиника – Доҕордоһуу болуоссатыгар,

— Дьокуускайдааҕы 2-с нүөмэрдээх балыыһа – “Оригинал” атыы киинигэр (Можайскай уул. 27),

— Дьокуускайдааҕы 3-с нүөмэрдээх балыыһа – 45-с нүөмэрдээх “Земляничка” оҕо саадыгар (Автодорожнай уул. 40/4)

— Дьокуускай куораттааҕы мэдиссиинэ киинэ – “Хоттей” атыы комплексыгар (Федор Попов уул. 8/1),

— Доруобуйа харыстабылын уонна медицинскэй сэрэтии өрөспүүбүлүкэтээҕи киинэ – “Елочка” атыы киинигэр (Кеша Алексеев уул. 7).