Дьокуускайга эр киһи массыына түннүгүн алдьатан, солуонтан мал уорбут

Дьокуускай куорат 1 №-дээх полициятын отделын дьуһуурунай чааһыгар олохтоох киһи уоруу туһунан сайабылыанньа түһэрбит.

Биллибэт киһи кини массыынатын түннүгүн алдьатан, тус докумуоннардаах суумкатын, суотабай төлөпүөнүн уонна наушниктарын уорбут. Уопсай хоромньу 28 тыһыынча солкуобайтан тахса буолбут. Бу туһунан ИДьМ сулууспатын «Дьокуускайдааҕы» салаатын пресс-сулууспата иһитиннэрэр.

Суһал-көрдүүр дьаһаллар түмүгэр холуобунай ирдэбил үлэһиттэрэ уорбаланааччы ким буоларын быһаарбыттар. Хара санаалаах халабырдьыт Дьокуускай куорат 45 саастаах, урут сууттана сылдьыбыт,  олохтооҕо буолара биллибит. Силиэстийэҕэ быһаарыллыбытынан, уорбаланааччы Өлүөнэ эбэ кытылыгар сылдьан, массыына кэлэн тохтообутун, онтон дьон тахсан массыыналарын хатаан баран мотуордаах оҥочонон устан барбыттарын кэтээбит.

Чугаһынан ким да суоҕун билэн, сүгэнэн икки ойоҕос түннүгү алдьатан, малы-салы уоран баран куоппут. Уоруллубут мал былдьанна. «Уоруу» ыстатыйатынан холуобунай дьыала тэрилиннэ. Бу ыстатыйанан буруйдаах  5 сылга диэри күөҥүлэ быһыллыан сөп.