Дьокуускайга эр киһи подъезд иннигэр дьахтары сынньыбыт

Дьокуускайга Петровскай уулуссаҕа элбэх кыбартыыралаах дьиэ подъеһын иннигэр эр киһи дьахтары сынньыбыт.

Бу чахчынан бэрэбиэркэ ыытыллар. Бэрэбиэркэ түмүгүнэн процессуальнай сөптөөх быһаарыы ылыллыаҕа диэн  ИДьМ сулууспатын «Дьокуускайдааҕы» салаатын пресс-сулууспата иһитиннэрдэ.

Дьахтары эр киһи сынньар быһылааны ааһан иһэр дьон видеоҕа устан социальнай ситимнэринэн тарҕаппыттар. Видеоҕа эр киһи сиргэ сытар дьахтары тэбиэлиир, баттаҕыттан соһор, онтон подъезка күүһүнэн өттөйөн киллэрэрэ көстөр.

Полицейскайдар дьахтарга саба түспүт эр киһи ким буоларын быһаарбыттар — Алдан улууһуттан төрүттээх 33 саастаах эр киһи буолара биллибит.

«Эр киһи полиция отделыгар киллэрилиннэ. Барыллаан быһаарыллыбытынан, эр киһи бииргэ олорор дьахтарын кытта арыгы иһэн баран иирсээн тахсыбыт», — диэн полиция иһитиннэриитигэр ыйыллар.