Эр киһи үс күн устата атын киһи каартатынан туһаммыт

Дьокуускайга полицейскайдар баан каартатыттан харчы уоруутугар уорбаланааччыны туттулар. Бу туһунан ИДьМ сулууспатын«Дьокуускайдааҕы» салаатын пресс-сулууспата иһитиннэрэр.

Дьокуускайдааҕы полиция 2-с №-дээх отделын дьуһуурунай чааһыгар дьахтар тыллаабыт. Кини счетуттан уопсайа 28 500 солк. суумалаах харчы уһуллубутун бэлиэтии көрбүт. Суһал-көрдүүр тэрээһиннэр кэмнэригэр полиция үлэһиттэрэ уорбаланааччыны быһаарбыттар. Хара санаалаах Хаҥалас улууһуттан төрүттээх, 42 саастаах, урут сууттана сылдьыбыт эр  киһи буолара биллибит.

Силиэстийэҕэ быһаарыллыбытынан, уорбаланааччы баан каартатын бииргэ олорор билэр дьахтарыттан арыгы атыылаһаары ылбыт. Ол гынан баран, дьахтар көрдөһүүтүн толорбокко, үс күн устата каартаны бэйэтин тус наадатыгар  туһаммыт. Ону таһынан, буруйу оҥорооччу каартаттан харчыны уһула сатаабыт, ол гынан баран пин-коду сыыһа киллэрэн, ххара дьайыытын ситэрбэтэх. «Уоруу» ыстатыйатынан холуобунай дьыала тэрилиннэ. Эр киһи алта сылга диэри көҥүлэ быһыллыан сөп.