Дьокуускайга эр киһини массыына түҥнэри көттө

Бэҕэһээ, олунньу 1 күнүгэр, Дьокуускайга Можайскай уулуссаҕа суолу туораан эрэр эр киһини массыына түҥнэри көттө. Эмсэҕэлээбит киһи быһылаан тахсыбыт сиригэр тыына быстыбыт. Билиҥҥи туругунан, балаһыанньа уонна кимнээх манна буруйдаахтара быһаарыллар.

Бу туһунан ИДьМ Дьокуускайдааҕы ГИБДД салаатын начаалынньыгын эбээһинэһин толорооччу Михаил Филиппов иһитиннэрэр:

— Бэҕэһээ, олунньу 1 күнүгэр, Можайскай уулуссаҕа, Циолковскай 24/2 аадырыс таһынааҕы уота-күөһэ суох хараҥаҕа, суол учаастага оҥоһулла сылдьар сиринэн  эр киһини массыына түҥнэри көттө. Ылбыт эчэйиилэриттэн эр киһи тыына быһынна. Билиҥҥи туругунан, быһылаан тула бэрэбиэркэ бара турар. Быһылаан тахсыбыт сиригэр силиэстийэлиир бөлөх уонна Госавтоинспекция үлэлиир.