Дьокуускайга Дьиэ кэргэн, таптал уонна бэриниилээх буолуу күнүн бэлиэтээтилэр

От ыйын 8 күнүгэр, оптуорунньукка, Дьокуускайга Өрөспүүбүлүкэ болуоссатыгар ЗАГС салалтатын тэрийиитинэн Дьиэ кэргэн, таптал уонна бэриниилээх буолуу күнүн бэлиэтээтилэр.

Бырааһынньык «Улахан дьиэ кэргэн вальса» диэн үҥкүү флешмобунан түмүктэннэ, онно баҕалаах кэргэнниилэр бары кытыннылар, диэн ЯСИА иһитиннэрэр.

Ульяна уонна Василий Пактар тэрээһин туһунан биллэриини социальнай ситимнэргэ көрөн, бырааһынньыкка кыттарга быһаарыммыттар. «Быйыл алтынньы 19 күнүгэр биһиги кэргэмминээн холбоспуппут 35 сылын бэлиэтиэхпит. Флешмоб туһунан бастаан кэргэним билбитэ уонна кыттар баҕатын эппит. Мин, биллэн турар, кинини өйөөтүм. Биһиги өрөспүүбүлүкэбитигэр сыл аайы от ыйын 8 күнүгэр ыалларга аналлаах интэриэһинэй тэрээһиннэр элбээн иһэллэрэ үөрдэр», — диэн Василий Пак үллэһиннэ.

Ону таһынан үөрүүлээх тэрээһин чэрчитинэн, аҥаар үйэттэн ордук бииргэ олорбут түөрт ыал — Айталина уонна Алексей Поповтар, Галина уонна Алексей Нестеровтар, Арабелла уонна Виктор Богомоловтар, Людмила уонна Иван Неустроевтар «Дьиэ кэргэн килбиэнэ» бэлиэнэн наҕараадаланнылар.

Бырабыыталыстыба бэрэссэдээтэлин солбуйааччыта Ольга Балабкина бэлиэтээбитинэн, бу дьиэ кэргэттэр уһун сыллар устата харыстанан кэлбит бэриниилээх буолуу, убаастабыл уонна таптал дьиҥнээх холобурдара буолаллар.

«Дьиэ кэргэн – бу тирэх, көҕүлээһин уонна күүс-уох төрдө, биһигини хайдах баарбытынан кэтэһэр уонна ылынар сирбит. Бу – көлүөнэттэн көлүөнэҕэ бэриллэр үгэстэр, бу – таптал, кыһамньы уонна өйдөһүү. Хас биирдии киһиэхэ бэйэтин дьолун буларга эбэтэр харыстыырга уонна чугас сүрэхтэринэн тулалыы сылдьалларыгар баҕарабыт!» — диэн Ольга Балабкина киин куорат ыалдьыттарын уонна олохтоохторун эҕэрдэлээтэ.