Хаартыска: «Чолбон» сурунаал эрэдээксийэтэ
Бэҕэһээ, кулун тутар 22 күнүгэр, «Чолбон: өй күрэһэ. Улахан оонньуу» Дьокуускай куоракка буолан ааста.
В.Г. Белинскэй аатынан кыраайы үөрэтэр бибилэтиэкэҕэ ааҕыынан үлүһүйэр, саха литературатын сэҥээрэр тоҕус хамаанда күөн көрүстэ. Түөрт түһүмэхтээх оонньуу бэрт сэргэхтик ааста.
Хас түһүмэх кэннэ хамаандалар ыйытыылар сөптөөх хоруйдарын көрөн, ким сыыспыт кыһыйа, оттон таба тайаммыттар ытыс таһына олордулар. Түмүккэ эрийсиилээх киирсиигэ эгил-тэгил испит Стручковтар уонна Дьячковскайдар дьиэ кэргэн үһүс миэстэни былдьаһан эбии ыйытыыларга хоруйдаатылар, ол түмүгэр биир очконан Дьячковскайдар баһыйан таҕыстылар. Иккис миэстэ Атласовтар буоллулар. Кыайыы өрөгөйүн Бубякиннар биллилэр. Кинилэр киин куорат чиэһин муус устарга буолар оонньууга көмүскүөхтэрэ, онно 12 улуус хамаандатын кытта киирсиэхтэрэ.
Санатар буоллахха, бу киин куоракка буолбут оонньуу бастакы түһүмэх түмүктүүр оонньуута буолла.
Тамара Петровна, үһүс миэстэлээх Дьячковскайдар эдьиийдэрэ: «Оонньуу буоларын дьүөгэм эппитэ, кыттыҥ диэн тылыгар киллэрбитэ. Эрдэ маннык өй оонньуутугар хаһан да кыттыбатахпыт. Дьиэнэн ааҕарбытын сөбүлүүбүт, оҕолорбутун, сиэннэрбитин эмиэ сыһыарабыт».
Варвара Александровна, иккис миэстэлээх Атласовтар эбэлэрэ: «Биһиги аймаҕынан бары сахалыы бэчээккэ суруйтарабыт, хайа эрэ ыал „Чолбоҥҥо“, кимнээх эрэ „Далбар хотуҥҥа“, онон төрөөбүт тылбытынан тахсар суруйуулары барытын билэ-көрө олоробут. Дьэ, дойдубар Мэҥэ Хаҥаласка таҕыстахпына барытын мунньана олорон ааҕабын».
Прокопий Петрович, бастакы миэстэ буолбут Бубякиннар аҕалара: «Ааҕыыга миигин ийэм Ульяна Петровна угуйбута. Кини ордук сөбүлээн „Хотугу сулуһу“ ааҕара. Мин ону батыһан оҕо сылдьан дьиэбитигэр баар икки дьааһык кинигэни, үс куул сурунаалы аахпытым. Онон ол саҕана тахсыбыт улахан айымньылары барытын аахпытым.Оҕо эрдэхпинэ аахпытым туһалаан, холобур, бүгүн Далан „Дьикти сааһыттан“ баар ыйытыыга сөпкө хоруйдаатым. Оттон сорох ыйытыылар эппиэттэрин, холобур, суруйааччылар олохторугар, тылбааска сыһыаннаах тиэмэлэри мин кэлин университекка саха тылын факультетыгар үөрэнэ сылдьан билбитим, истибитим. Билиҥҥи ааҕыы сыаналаммат буолбут курдук кэмигэр, бу курдук ыыта сылдьар улахан үлэҕит иһин „Чолбон“ сурунаалга махтанабын».
«Чолбон» сурунаал эрэдээксийэтэ
Саха сиригэр ыам ыйыгар 890 оҕо төрөөбүт. Кинилэр бары “Үйэ оҕолоро” тус сыаллаах хапытаалы ылыахтара.…
Уус Маайа оройуонугар уу таһыма үрдээбитинэн сибээстээн, үрдүк бэлэмнээх буолуу эрэсиимэ киллэрилиннэ. Бары сулууспалар бары…
Саха сирин олохтооҕо анды мончуугун хаачыстыбалаах уонна бэйэ оҥорбут кыраасканан сотор кистэлэҥин кытта үллэһиннэ. Видеону…
Алдан оройуонун Чагда сэлиэнньэтигэр халаан уутун содулуттан эмсэҕэлээбиттэр хоромньуларын сыаналааһын үлэтэ саҕаланна. СӨ Гражданскай оборуона…
Кытайга V Шанхайдааҕы норуоттар икки ардыларынааҕы хордар бэстибээлин «Хор сүрэҕэ» куонкурус түмүктэннэ. Арассыыйа чиэһин көмүскээбит…
«Арыгы састааба суох пиибэ утаҕы иһэрдиигэ билиһиннэрии экскурсиятын оҥоробут», - диэн биллэрии ФАПК "Якутия" тэрилтэ…