Дьокуускайга өссө биир тэллэйдьит тыаҕа муммут

От ыйын 9 күнүгэр киэһэ хойут Саха сирин быыһааччылара тыаҕa муммут 85 саастаах киһини көрдүү тахсыбыттар.

Аҕам саастаах эр киһи дьиэ кэргэнин кытта тэллэйдии тахсан баран, муммут. Бу туһунан Саха сиринээҕи Быыһыыр сулууспатын пресс-сулууспата иһитиннэрэр.

Кырдьаҕас аймахтара 112 нүөмэргэ эрийэн, көмө көрдөөбүттэр. Уола аҕата Маҕаанныыр суол 6-с килэмиэтиригэр сүппүтүн туһунан тыллаабыт.

Эр киһи мөлтөхтүк истэр эбит. Киэһээ 22:10 чааска алта быыһааччы Хатыҥ Үрэх шоссеттан Маҕанныыр суол 7-с килэмиэтиригэр диэри тыаны кэрийбиттэр. Көрдүүр кэмҥэ кырдьаҕаһы олохтоохтор булан, дьиэтигэр илдьибиттэрэ биллибит.

«Кырдьаҕас  туруга үчүгэй, балыыһаҕа киирэртэн аккаастаммыт», — диэн Саха сиринээҕи Быыһыыр сулууспатын пресс-сулууспата чопчулаата.