Дьокуускайга Федор Охлопков кэриэһигэр аналлаах снайпердар турнирдарын кыттыылаахтара анал бириистэри туттулар

Аҕа дойду Улуу сэриитин кэминээҕи номоххо киирбит бэргэн ытааччыта, Сэбиэскэй Сойуус Дьоруойа Федор Охлопков кэриэһигэр аналлаах ыраахха ытыыга Бүтүн Арассыыйатааҕы турнир кыттыылаахтара дьүүллүүр сүбэ быһаарыытынан олохтоммут хас да анал бирииһи туттулар диэн www.sakha.gov.ru иһитиннэрэр.

Күрэхтэһии Дьокуускай куоракка алтынньы 3-5 күннэригэр РФ Бырабыыталыстыбатын Бэрэссэдээтэлин солбуйааччыта – РФ Бэрэсидьэиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев салайыытынан буолан ааста.

Бастакы анал бирииһи – турнир сүрүн судьуйата Юрий Трутневтан бойобуой быһахтары хорсуннарын иһин Сергей Клюгка уонна Максим Токаревка туттардылар. Кинилэр 3200 миэтэрэ ыраахтан сыалы ыттылар.

«Түүҥҥү ытыы» түһүмэххэ 2100 миэтэрэ ыраахха бастакы миэстэни ылбыт «Физрук» позывнойдаах снайпер уонна «Ридик» позывнойдаах корректировщик «Эльга» ХК-тан 3 мөлүйүөн солкуобайдаах анал бирииһи тутта. Турнир иккис түһүмэҕин түмүгүнэн кыттааччылар Арассыыйатааҕы бойобуой снайпинг Федерациятыттан эмиэ анал бириистэринэн бэлиэтэннилэр.

Күрэхтэһии «Сулус» үөрэнэр-ытар кииҥҥэ ыытылынна, онно дойду араас эрэгийиэннэриттэн 120-тэн тахса киһи, ол иһигэр байыаннай дьайыы кыттыылаахтара, муһуннулар.

«Мин  байыаннай дьайыы зонатыттан эргиллэн кэлбит кыттааччыларга сүгүрүйүөхпүн баҕарабын. Эһиэхэ махтал! Бу турниры биһиги туохха анаан ыытабытый? Биһиги дойдубут иһин уустук уонна суолталаах снайпердар үлэлэрин ускуустубатын кистэлэҥнэринэн атастаһар түһүлгэ баар буолуон баҕарабыт. Манна бастыҥ ытааччылар кэлэллэрин уонна кинилэр үүнэр-сайдар түһүлгэлээх, сайдарга кэскиллээх буолалларын ситиһэ сатаатыбыт», – диэтэ Юрий Трутнев.

Тэрээһини РФ Бэрэсидьиэнин Уһук Илиҥҥэ боломуочуйалаах бэрэстэбиитэлин аппараата, Арассыйатааҕы бойобуой снайпинг Федерацията, Саха Өрөспүүбүлүкэтин  Бырабыыталыстыбата, «ВОИН» киин тэрийдилэр.

«Түүҥҥү ытыы» түһүмэххэ 2100 миэтэрэ түмүктээх кыайыылаахтар – «Физрук» позывнойдаах снайпер уонна «Ридик» позывнойдаах корректировщик – турнир рекордун олохтотулар. Түүнҥү ытыыга иккис миэстэҕэ «Гусар» позывнойдаах снайпер уонна «Хантер» позывнойдаах корректировщик таҕыстылар. Үһүс миэстэни снайпер Евгений Соловьев уонна корректировщик Сергей Кириченко ыллылар.

«Күнүскү ытыы» түһүмэххэ 2000 миэтэрэ түмүктээх бастакы миэстэ Саха сирин ытааччыларыгар Леонид Архангельскайга уонна Михаил Ефимовка анаммыта. Иккис миэстэ – «Белый» позывнойдаах снайперга уонна «Добрый» позывнойдаах корректировщикка. Үһүс миэстэни бииргэ төрөөбүт снайпердар Сергей уонна Александр Антоновскайдар ыллылар.

Иккис түһүмэх кыайыылаахтарыгар күрэхтэһии сүрүн бирииһэ –  пикап массыына туттарылынна, үрүҥ көмүс призердарга – «Сокол» вездеход. Үһүс миэстэ хаһаайыттара 500 тыһыынча солкуобайдаах харчынан бирииһинэн наҕараадаланнылар.