Дьокуускайга фехтованиеҕа күрэхтэһии буолан ааста

Ыам ыйын 25 кнүгэр Дьокуускайга «Модун» успуорт комплексыгар РФ Дьоруойа Алексей Неустроев чиэһигэр фехтованиеҕа аһаҕас турнир буолан ааста.

Күрэхтэһиигэ 11 кыыс, 11 уол кыттыыны ылла. Оҕолору саастарынан үс бөлөххө араардылар.

Бу күрэхтэһии оҕолорго успуорт бырааһынньыгын курдук күргүөмнээхтик, долгутуулаахтык ааста. Бэлиэтээн суруйдахха, кэлиҥҥи сылларга фехтование көрүҥэ киэҥник биллэр-көстөр буолан эрэр. Күрэхтэһии кыттааччылара дьиҥ успуорка дьоҕурдаахтарын көрдөрдүлэр. Турнир бирииһин пуондата 100 тыһ.солкуобай. Ол курдук турнир успуонсарынан эрэгийиэн фехтованиеҕа Федерациятын бэрэсидьиэнэ Вячеслав Быковников уонна «СТАЛЬ» фитнес-кулууп буоллулар.  Маны сэргэ урбаанньыт Майя Федорова уонна тутуу хампаанньата улахан өйөбүлү оҥордулар.

Кыайыылаахтар сыаналаах бэлэхтэринэн наҕараадаланнылар. Бу турнир өрөспүүбүүкэҕэ фехтование сайдыытыгар улахан хардыыны оҥордо.