Дьокуускайга ГАИ патруллара күүһүрдүллүбүт үлэ эрэсиимигэр көстүлэр

Дьокуускайга ахсынньы 21 күнүгэр диэри ГАИ патруллара күүһүрдүллүбүт эрэсиимнээх үлэҕэ көстүлэр.

Сүрүн төрүөтэ – 11 ый түмүгүнэн суол быһылааннарыгар өлбүт дьон ахсаана үрдээбит. Бу иһитиннэрии киин куорат планеркатын кэмигэр, ахсынньы 8 күнүгэр, этилиннэ.

Дьокуускайга сыл саҕаланыаҕыттан суол быһылааннарыгар 22 киһи олоҕо быстыбыт. Былырыын бу кэмҥэ массыына саахалыгар өлүү 29 бырыһыанынан аҕыйах эбит. Уопсайа, ааспыт нэдиэлэҕэ эрэгийиэн киин куоратыгар 58 суол быһылаана уонна 2318 суол быраабылатын кэһиитэ бэлиэтэммит. Сэттэ киһи эчэйбит, ол иһигэр – биэс оҕо.