Дьокуускайга гарааска бурдук аһы оҥорон атыылыы сылдьыбыттар

Дьокуускайга чааһынай дьиэ гарааһыгар санитарнай нуормалары кэһэн, бурдук аһы астыы сылдьаллара биллибит. Манна астаммыт бородууксуйа атыыга барар эбит. Гарааска кэһиини бэлиэтээн, Роспотребнадзор Саха сиринээҕи Управлениетын үлэһитин ыҥырбыттарын туһунан СӨ ИДьМ иһитиннэрэр.

ИДьМ уонна Росгвардия үлэһиттэрэ «Нелегальный мигрант» эпэрээссийэ иитинэн, олорор секторы бэрэбиэркэлээбиттэр.

Кыргызстан өрөспүүбүлүкэтин икки олохтооҕо үлэ дуогабарыгар ыйыллыбатах идэлэринэн үлэлии-хамсыы сылдьыбыттар. Үлэни биэрээччигэ административнай боротокуол толоруллубут.

Кыргызстан өрөспүүбүлүкэтин үс олохтооҕо миграционнай учуокка үлэ сымыйа дуогабарын биэрэннэр, административнай эппиэтинэскэ тардыллыбыттар. Кинилэри үлэҕэ ылбыт дьоҥҥо процессуальнай бэрэбиэркэ ыытыллар.

Итиэннэ тас дойдуттан киирбит оҕолоох дьахтарга РФ сиригэр-уотугар сылдьыы эрэсиимин кэспитин иһин административнай боротокуол толоруллубут.