Дьокуускайга Гавриил Чиряев пааматынньыгар сибэкки дьөрбөтүн уурдулар

Бүгүн, муус устар 4 күнүгэр, саха норуотун биллэр-көстөр судаарыстыбаннай уонна бэлитиичэскэй диэйэтэлэ Гавриил Иосифович Чиряев 100 сылыгар анаммыт тэрээһиннэр буола тураллар.

Сарсыарда 11 чааска Аҕа дойду Улуу сэриитин кыттыылааҕа, өрөспүүбүлүкэни 17 сыл устата салайбыт уһулуччулаах салайааччы Гавриил Иосифович Чиряев пааматынньыгар  уопсастыбаннас үөрүүлээх миитинэ буолла.

Тыл этээччилэр Гавриил Чиряев 100 сыла Улуу Кыайыыны кытта ыкса сибээстээҕин бэлиэтээтилэр. Кини өрөспүүбүлүкэни салайбыт дьонтон Аҕа дойду Улуу сэриитин кыттыылааҕа буоларынан соҕотох.   Нерюнгри куорат тутуллуута, тимир суола кэлиитэ, Бүлүү ГЭС-һэ, Дьокуускай куоракка гаас киириитэ,  бырамыысыланнас уонна тыа хаһаайыстыбатын салаалара уонна атын эйгэҕэ балысхан сайдыы – барыта Гавриил Чиряевы кытта ыкса сибээстээх.

—  Үбүлүөйдээх бэлиэ сыл чэрчитинэн судаарыстыбаннай уонна бэлитиичэскэй диэйэтэл Гавриил Иосифович Чиряевка 48 тэрээһини бэлэмнээтибит. Былаан быһыытынан кини түмэлин саҥардыахпыт,  Бүлүү куоратыгар саҥа таас  оскуола тутуута саҕаланыаҕа. Бу оскуолаҕа Гавриил Чиряев аата  иҥэриллиэҕэ. Гавриил Чиряев аатын кытта быйыл 50 сылын бэлиэтиир Нерюнгри куорат төрүттэниитэ сибээстээх. Бу  куорат аэропордугар Г.И. Чиряев аата иҥэриллиэҕэ, — диэн эттэ СӨ Быраабыыталыстыбатын Бэрэсэдээтэлин солбуйааччы Анатолий Семенов.

– 1965-1982 сылларга Саха сиригэр  оҥорон таһаарыы баазата үөскээбитэ, бырамыысыланнас күүскэ сайдыбыта.  Нерюнгри куорат тутуллан, Беркакикка диэри тимир суол тутуллубута. Дьокуускай, Нерюнгри уонна Бүлүү электро-ыстаансыйалара тутуллубуттара, алмаас хостуур собуот үлэҕэ киирбитэ, өрөспүүбүлүкэ ньиэп  уонна гаас хостооһунугар суолталаах үлэни саҕалаабыта. Бу күннэргэ үтүөкэннээх салайааччы Гавриил Чиряев дойдутун туһугар оҥорбут дьыалатын үйэтитэргэ туһуламмыт дьаһалга Ил Дархан  Айсен Николаев илии баттаата, — диэн бэлиэтээтэ Ил Түмэн бэрэссэдээтэлэ Алексей Еремеев.

Уһулуччулаах салайааччы Гавриил Иосифович Чиряев пааматынньыгар сибэкки дьөрбөтүн төрөөппүт кыыһа Наталья Гаврииловна, министиэристибэлэр уонна биэдэмистибэлэр салайааччылара, биир дойдулаахтара бүлүүлэр, ыччаттар түмсүүлэрэ уурдулар. Үтүөкэннээх салаайаччы төрөөбүт күнэ дьоһуннаахтык чиэстэннэ.