Дьокуускайга  Гавриил Протодьяконов пааматынньыгын арыйдылар

Бүгүн, ыам ыйын 7 күнүгэр, Дьокуускайга  Кыайыы пааркатыгар  Аҕа дойду Улуу сэриитин кыттыылааҕа, РСФСР норуотун үөрэҕириитин үтүөлээх үлэһитэ, буойун-суруйааччы, учуутал уонна Чурапчы улууһун Бочуоттаах олохтооҕо Гавриил Дмитриевич Протодьяконовка аналлаах пааматынньык үөрүүлээх быһыыга-майгыга арылынна.

Үөрүүлээх тэрээһиҥҥэ Ил Дархан Айсен Николаев, бырабыыталыстыба чилиэннэрэ, норуот  дьокутааттара уонна уопсастыбаннас  бэрэстэбиитэллэрэ кытыннылар.

«Билигин биһиги дойдубутугар судургута суох кэм турар, ол гынан баран, биһиги утарсааччыларбытыттан уратыта  диэн, биһигиттэн кыайан былдьаабаттара. Ол – биһиэхэ көлүөнэ ситимнэһиитэ баар. Биһиги оҕолорбут байыаннай  дьайыы фронугар охсуһан, кинилэр улуу төрүттэрин өйдөбүнньүгүн дьоһуннаахтык харыстыылларын көрдөрөллөр”, — диэтэ Айсен Николаев.

Гавриил Протодьяконов фронтан төннөн баран, олоҕун педагогикаҕа анаабыта, Саха сирин хас да көлүөнэ ыччакка настаабынньыктаабыта.

Айсен Николаев  пааматынньык арыллыытын кэнниттэн Кыайыы стелатыгар сибэкки дьөрбөтүн уурда.