Дьокуускайга гимнастар Уһук Илиҥҥи федеральнай уокурукка бастыыр иһин күрэхтэһиэхтэрэ

Олунньу 12-16 күннэригэр Саха сирин киин куоратыгар Дьокуускайга аан бастаан художественнай гимнастикаҕа Уһук Илиҥҥи федеральнай уокурукка бастыыр иһин күрэхтэһиилэрэ буолуоҕа. 

Суолталаах тэрээһин эрэгийиэҥҥэ успуорт бу көрүҥэ олохтоохтук сайдан, гимнастикаҕа Саха сирин оскуолатын таһыма үрдээбитин  билинии туоһута.

СӨ художественнай гимнастикатын федерациятын пресс-сулууспата иһитиннэрбитинэн, олунньу 3 күнүнээҕи чахчынан, федеральнай таһымнаах тэрээһиҥҥэ бөлөҕүнэн эрчиллиигэ 10 эрэгийиэнтэн 28 хамаандаттан, биирдиилээн күрэхтэһиигэ 129 гимнастан сайаапка киирдэ. Ол курдук гимнастар Хабаровскайтан, Приморьеттан, Камчаткаттан, Забайкалье кыраайыттан, Сахалинтан, Амуртан, Магадаантан кэлэн кыттыахтара.

Далааһыннаах күрэхтэһиигэ уопсайа 297 гимнаст күөн көрсөр. Күрэхтэһии түмүгэ бастакы спортивнай категория уонна успуорт маастарыгар хандьыдаат хамаандаларын икки ардыларыгар, биирдиилээн күрэхтэһиилэргэ уонна хамаанданан күрэхтэһиигэ, ону тэҥэ спорт маастарыгар хандьыдаат (СМС) уонна бастакы спортивнай категория хамаандаларын икки ардыларыгар бөлөҕүнэн тахсыаҕа. Саха сирин чиэһин биирдиилээн многоборьеҕа уонна хамаанданан многоборьеҕа 2013-2014 сыллаах 10 гимнаст (12, 13 саастаах) бастакы анал разрядка көмүскүөҕэ. Успуорт маастарыгар хандьыдаат бырагыраамаҕа, 2011-2012 сс. төрөөбүт (14, 15 саастаах) – 6 гимнаст кыттыаҕа.

Бастыыр иһин ыытыллар улахан күрэһи РФ успуорка министиэристибэтин өйөбүлүнэн Арассыыйа гимнастикаҕа федерацията тэрийэр. Кыттыгас тэрийээччилэр: СӨ успуорт министиэристибэтэ уонна СӨ художественнай гимнастикатын федерацията.

Күрэхтэһии олунньу 12-16 күннэригэр Дьокуускай куорат Ильменскай уулусса 27, 9 № Оҕо спортивнай оскуолатыгар ыытыллар.