Дьокуускайга гостиница уоруйаҕын туттулар

Дьокуускай куорат ИДьМ 2 №-дээх полициятын дьуһуурунай чааһыгар киин куорат олохтооҕо 30 тыһыынча солкуобай суумалаах суотабай төлөпүөнүн уонна баан счетуттан 40-ча тыһыынча кэриҥэ суума харчытын уорбуттарын туһунан тыллаабыт.

Суһал-көрдүүр дьаһалларынан холуобунай ирдэбил үлэһиттэрэ уорбаланааччыны туттулар. 35 саастаах эр киһи буолара биллибит.

Хара санаалаах эдэр киһи гостиницаҕа хос ылбыт уонна дьахтары, кини доҕорун кытта билсибит. Саҥа билсибит  дьон дьахтар хоһугар  арыгы испиттэр. Биир түгэҥҥэ эдэр киһи дьахтар төлөпүөнүн уоран кыбынан тахсыбыт. Кэлин онлайн-баан көмөтүнэн  төлөпүөнүнэн 36 тыһыынча солкуобайы уорбут. Уорбут харчыны  таксыыга, маҕаһыыннарынан ороскуоттаабыт. Ол кэннэ уорбаланааччы  суотабай төлөпүөнү атыылаабыт.

Силиэстийэ кэмигэр эр киһи Дьокуускай куорат гостиницаларыттан үс төгүл уорбута билиннэ. Билигин полиция үлэһиттэрэ кинини атын уорууга кыттыгастарын бэрэбиэркэлииллэр. Холуобунай дьыала тэрилиннэ. Уорбаланааччы 5 сылга диэри  көҥүлэ быһыллыан сөп.  Бу туһунан СӨ ИДьМ пресс-сулууспата суруйар.