Дьокуускайга «Гражданскай уопсастыба: Кыайыы туһугар сомоҕолоһуу» Гражданскай пуорум ыытыллыаҕа

 Дьокуускайга балаҕан ыйын 9-10 күннэригэр Саха сирин гражданскай уопсастыбатын институттарын сүрүн тэрээһинэ – «Гражданскай уопсастыба: Кыайыы туһугар сомоҕолоһуу» Гражданскай пуорум ыытыллыаҕа. Бу туһунан sakha.gov.ru иһитиннэрэр.

Тэрээһин Аҕа дойду Улуу сэриитигэр Кыайыы 80 сылыгар, Арассыыйаҕа Аҕа дойдуну көмүскээччи сылыгар уонна Саха сиригэр Ийэ дойдуну көмүскээччи сылыгар ананыаҕа. Бу туһунан эрэгийиэн Ыччат дьыалаларыгар уонна социальнай коммуникацияларга миниистирин солбуйааччыта Александр Максимов иһитиннэрдэ.

«Быйыл биһиги Кыайыы 80 сылын бэлиэтиибит. РФ Бэрэсидьиэнэ Владимир Путин Ыйааҕынан бу сыл дойдуга Аҕа дойдуну көмүскээччи сылынан биллэриллибитэ. Биһиги Ил Дархаммыт Айсен Николаев Саха сиригэр Ийэ дойдуну көмүскээччи сылынан биллэрбитэ. Ол иһин Гражданскай пуорум былаһааккаларыгар биһиги болҕомтобутун Ийэ дойду иннигэр ытык иэскэ, эппиэтинэскэ, эр санааҕа уонна киэн туттууга ууруохпут», – диэтэ Александр Максимов.

Пуорум чэрчитинэн уопсайа биэс тиэмэлээх былаһаакка үлэлиэҕэ. «Сүрүн былаһааккалартан биирдэстэрэ байыаннай дьайыы кыттыылаахтарын уонна бэтэрээннэрин, ону таһынан кинилэр дьиэ кэргэттэрин өйүүр миэрэлэргэ ананыаҕа. Судаарыстыба уонна гражданскай уопсастыба өттүттэн өйөбүл, кыһамньы, болҕомто тиэмэтэ олус суолталаах», – диэн Александр Максимов бэлиэтээтэ.

Пленарнай мунньах «Гражданскай уопсастыба: Кыайыы туһугар сомоҕолоһуу» тиэмэҕэ ананыаҕа, онно бары дэлэгээссийэлэр кыттыыны ылыахтара. Биэс былаһаакка үлэтин түмүгүнэн уопсай түмүктэри уонна этиилэри көрдөрөр өрөсөлүүссүйэ ылыллыаҕа.