Дьокуускайга «ГТО-2024 оонньуулара» Уһук Илин аһаҕас кубогын сүүмэрдиир түһүмэҕэ саҕаланна

Дьокуускайга «Кыайыы 50 сыла» успуорт дыбарыаһыгар от ыйын 18-20 күннэригэр «ГТО-2024 оонньуулара» Уһук Илин аһаҕас кубогар сүүмэрдиир турнира ыытыллар.

Күрэхтэһиигэ өрөспүүбүлүкэ 11 улууһуттан 120 атлеттара кытталлар. Түмүктүүр түһүмэҕэ балаҕан ыйыгар Владивостокка ыытыллар Илиҥҥи экэнэмиичэскэй пуорум чэрчитинэн буолуоҕа.

«Күрэхтэһиигэ 120 спортсмен кыттар. Ол иһигэр Уус Маайа уонна Орто Халыма курдук ыраах улуустарыттан спортсменнар кэлбиттэр»,-диэн бэлиэтээн эттэ Бүтүн Арассыыйатааҕы ГТО физкултуурунай- спортивнай комплекс эрэгийиэннээҕи киинин началынньыга Ариян Александров. Күрэхтэһии сааһыттан уонна успуорка таһымыттан көрөн биэс категориянан араарыллан ыытыллар:

• оскуола оҕолоро уонна улахан дьон: уолаттар (14-тэн 17-гэр диэри саастаахтар), эр дьон уонна дьахталлар (20-тэн 49- гар диэри);
• биирдиилээн зачекка: «любителлэр» (эр дьон уонна дьахталлар 18- тан 49- гар диэри), «профессионаллар» (эр дьон уонна дьахталлар 21-тэн 39-гар диэри) уонна «маастардар» ( 40-гар диэри уонна онтон үөһэ саастаах бэтэрээннэр).

Атлеттар хас биирдии категорияларынан араас тургутуулар көрүллэллэр. Ону таһынан Ариан Александров бэлиэтииринэн, быйыл сорох тургутууларга кэккэ уларыйыылар бааллар. «Быйыл тургутуулар арыый да уустук буолаллар, чуолаан эрчиллиини оҥоруу ахсаана элбээтэ. Холобур, гантелары көтөҕүүнү 10 төгүл оҥорор буолаллара, быйыл – 15 уонна ол курдук салҕанан барар», — диэтэ Ариян Александров.

Күрэхтэһиигэ «Азия оҕолоро» оонньууларга кыттыбыт мини-футбол хамаандатыттан үс спортсмен киирсэр. Саха футболистара оччолорго үрүҥ көмүс призердарынан буолбуттара. «Оҕолор күүстэрин ГТО-ҕа бэрэбиэркэлииргэ быһаарыннылар. Мин санаабар, бэйэлэрин кыахтарын бэрэбиэркэлиир олус интэриэһинэй буолуо дии саныыбын. Салгыы хайдах буолуоҕун көрүөхпүт»,- диэн мини-футболга сүүмэрдэммит хамаандатын старшай тириэньэрэ Олег Марченко санаатын үллэһиннэ.

Күрэхтэһии түмүгүнэн эрэгийиэн үөрэнээччилэрин, улахан дьон уонна биирдиилэн кыттааччылары киллэрэн туран, Саха сирин сүүмэрдэммит хамаандалара тэриллиэхтэрэ. III Уһук Илиҥҥи «ГТО-2024 оонньуулара» Кубога Владивостокка Русский арыыга Илиҥҥи экэнэмиичэскэй пуорум чэрчитинэн балаҕан ыйын 2-тэн- 8 күннэригэр диэри ыытыллыаҕа.