Дьокуускайга Хаар-муус паарка аһылынна

Олунньу 14 күнүттэн Дьокуускай куоракка 202-с түөлбэҕэ даамба аттынан өрүс боротуохатыгар баар Хаар-муус паарка үлэтин саҕалаата. 

Манна улахан, уһун сыыры, икки кыра уонна биир хороон иһинэн сырылыыр сыыры оҥорбуттар. Хаҥкылыыр каток, итии чэйдээх кафе, туалет үлэлииллэр. «Буранынан», «банаанынан», «снегоходунан»  хатааһылыахха сөп. «Ледянкалары», «зорбтары», «ватрушкалары» уларсан, эмиэ сырылыахха сөп. Холобур, «ледянканы» уларсыы — 100 солкуобай, маны тэҥэ, 200 солкуобайы солуок гынан хаалларыахтааххын. Уу харчынан эрэ ылаллар эбит, кэлэр дьон ону учуоттаарыҥ.

Хаар-муус оҥоһуктарга эрдэ анал куонкурус тэрийбиттэр. Ол курдук, маастардар хаар оҥоһуктары «Хаар абылаҥа» диэн көҥүл тиэмэҕэ чочуйбуттар, оттон муус оҥоһуктарга күн тиэмэтин талбыттар. Норуоттар икки ардыларынааҕы куонкурус буолан, Кытай, Монголия маастардара кэлэн кыттыбыттар.

Хаар-муус паарка дириэктэрэ Алексей Демьянов: «Сыл аайы скульптуралары, аттракционнары тупсара сатыыбыт», — диэн кэпсээтэ. Бүгүн киһи аҕыйах, ол да буоллар, үлэһиттэр бары миэстэлэригэр бааллар. «Паарка аһыллыбытын иһиттэхтэринэ, мантан киэһэ дьон элбиэҕэ«, — дэһэллэр үлэһиттэр. Өссө да тупсара, уотун-күөһүн оҥоро сылдьаллар, хараҥардаҕына, уота-күөһэ ыраахтан сандаарыаҕа.

 

Паарка сарсыарда 11 чаастан киэһэ 11 чааска диэри үлэлиир. Билиэт сыаната быйыл үрдээбит — улахан дьоҥҥо 600 солкуобай, 140 см намыһах оҕолорго 400 солкуобай, 107 см намыһах оҕолор босхо сылдьыахтарын сөп. Маны тэҥэ, элбэх оҕолоох дьиэ кэргэттэргэ, анал байыаннай дьайыы кыттыылаахтарын дьиэ кэргэттэригэр, инбэлииттэргэ чэпчэтиилээх билиэттэр бааллар.