Дьокуускайга Халыма сэлиэнньэтиттэн сылдьар байыаһы көрүстүлэр

Дьокуускай куорат аэропуордугар байыаннай эпэрээссийэттэн кэлбит Юрий Нестеровы көрүстүлэр. Юрий Орто Халыма улууһун Березовка сэлиэнньэтигэр баһылыктаабыта, байыаннай эпэрээссийэҕэ баран гранатометчик көмөлөһөөччүтүнэн уонна ыстаарсай стрелогынан сырытта.

«Билиҥҥитэ инники былааннар тустарынан толкуйдаабаппын. Чугас дьоммун көрсөн олус үөрдүм. Билигин ытык иэстэрин толоро сылдьар уолаттар бэйэлэрин харыстаналларыгар баҕарабын. Ону бэйэлэрэ да билэллэр, онно сүрүнэ диэн төбөнү үлэлэтиэххэ наада», -– диэн саха байыаһа санаатын үллэһиннэ.

Санатан эттэххэ, Березовка сэлиэнньэтигэр хотугу сир аҕыйах ахсааннаах төрүт норуоттара -– эбээннэр түөлбэлээн олороллор. Юрий Нестеров салалтатынан ууга барар сэлиэнньэни үрдүк сиргэ көһөрүү бырагыраамата үлэлээбитэ.

«Юрий Юрьевич дойтугар эргиллэн кэлбитигэр олус үөрдүбүт. Кини бааһыран кэлбит, онон эмтэнэн уонна доруобуйатын чөлүгэр түһэрэн баран, дойдубут туһугар үлэлиэҕэр эрэнэбит», -– диэн Саха сирин бырабыыталыстыбатын бэрэссэдээтэлин бастакы солбуйааччы Дмитрий Садовников эттэ.

Онтон Юрий Нестеров кыыһа Марина эппитинэн, аҕалара кылгастык да буоллар, төһө кыалларынан сибээстэһэ турбут. «Ол кылгас бириэмэҕэ бэйэтин туһунан кэпсээбэккэ, наар уопсай дьыалабатын ыйыталаһара. Биллэн турар, бары олус долгуйарбыт, наһаа ыарахан этэ. Билигин этэҥҥэ буолла, биһиги киниэхэ бырааһынньык остуолун тэрийэн кини сынньана кэлэрин долгуйа күүтэбит», -– диэн иһитиннэрдэ диэн СИА суруйар.