Дьокуускайга харчыны уорбут 17 саастаах оҕону туттулар

Дьокуускайдааҕы полиция отделын дьуһуурунай чааһыгар олохтоох киһиттэн 36 тыһ. солк. уорбуттарын туһунан сайабылыанньа киирбит.

Полиция үлэһиттэрэ уорбаланааччы лиичинэһин быһаардылар. Уорбаланааччы 17 саастаах эдэр уол буолара билиннэ. Бу туһунан ИДьМ пресс-сулууспата иһитиннэрэр.

Ол күн эмэсэҕэлээччи билэр дьонун  хампаанньатын кытта арыгы иһэн баран дьиэтигэр тиийбит. Дьиэҕэ киирэн иһэн подъезд иһигэр ыччаты кытта кэпсэппит. Уорбаланааччы эр киһи күүскэ итирбитин көрөн, сиэбиттэн харчылаах кумааһынньыгын уорбут.

Эдэр уол кэлин кэпсээбитинэн,  уорбут харчыны төлөпүөнүн батареятын уларытарга туһаммыт, оттон сорҕотун икки доҕотторугар бэлэхтээбит. Холуобунай дьыала тэрилиннэ. Эдэр уол биэс сылга диэри болдьоххо көҥүлүн быһыахтарын сөп.