Дьокуускайга ийэ оҕотун хоккей оонньуур маһынан охсубут, илиитин тоһуппут

Муус устар 24 күнүгэр түүн үөһүн саҕана Дьокуускайдааҕы 1-кы нүөмэрдээх полиция салаатын дьуһуурунай чааһыгар, Елочка түөлбэҕэ олорор дьахтар төлөпүөннээн 12 саастаах уолум дьиэтиттэн барда диэн иһитиннэрбит.

Сокуоннай саастарын туола иликтэр дьыалаларын иниспиэктэрэ тута бу иннинэ полиция хараҕын далыгар киирбэтэх, сураҕа суох сүппүт оҕо туһунан иһитиннэриини хомуйар, көрдүүр үлэни ыыппыт.

Бэрэбиэркэ ыытыллар кэмигэр полиция үлэһитигэр, сокуоннай сааһын туола илик оҕону кырабааһыҥҥа полицияҕа сайаапкалаабыт дьахтар кыттыгастааҕын туһунан суһал иһитиннэрии киирбит.

Иниспиэктэр хас да чаас анараа өттүгэр Мэдиссиинэ национальнай киинин педиатрияҕа салаатыгар этэ хас да сиринэн эчэйбит оҕону киллэрбиттэрин  быһаарбыт.

Быраастар уол этэ-хаана хас да сиринэн эчэйбитин быһаарбыттар, харытын уҥуоҕа тостубут, төбүтүгэр тыраамбаламмыт, хаҥас илиитин үс сиринэн тикпиттэр.

Быраастар көмөлөрүн кэнниттэн полиция сокуоннай сааһын туола илик оҕону “Берегиня” дьиэ кэргэҥҥэ көмөлөһөр кииҥҥэ илдьибит. Онно педагог баарына уол ийэтэ кэмиттэн кэмигэр кырбыырын туһунан иһитиннэрбит.

Уол этэринэн, ол күн дьиэтигэр хойутаан кэлбит эбит. Ол иһин ийэтэ хоккей оонньуур маһынан (клюшка) кырбаабыт. Салгыы дьиэ таһыгар кырбаабыт, оҕотун таһырдьа хаалларан баран аанын хатанан кэбиспит. Онтон оҕобун көрдөөҥ диэн полицияҕа сайабылыанньа суруйбут.

Дьокуускайдааҕы полиция салаатын сокуоннай саастарын туола иликтэр дьыалаларыгар иниспиэктэрэ хомуйбут матырыйаалыгар олоҕуран, СӨ Силиэстийэлиир кэмитиэтин силиэстийэлиир управлениетын силиэдэбэтэлэ РФ Холуобунай Кодексын 117 ст. 2 ч. (“Муҥнааһын”) холуобунай дьыаланы тэрийбит. Бу туһунан СӨ ИДьМ пресс-сулууспата иһитиннэрэр.