Дьокуускайга икки кистэлэҥ казино тэрилтэтин үлэтэ тохтотулунна

Саха сиринээҕи ИДьМ экэнэмиичэскэй куттал суох буолуутугар уонна коррупцияны утары охсуһар отделын үлэһиттэрэ силиэстийэлээччилэри кытта кыттыһан, Росгвардия «Бизон» ОМОН байыастарын өйөбүллэринэн Дьокуускайга сокуоннайа суох сүүйүүлээх оонньуунан дьарыктаммыт казинолар үлэлэрин тохтоттулар.

Бу туһунан Саха сиринээҕи ИДьМ пресс-сулууспата иһитиннэрэр. Петр Алексеев уонна Очиченко уулуссаларга баар дьиэлэргэ сокуону кэһэн сүүйүүлээх оонньуу тэрилтэлэрэ үлэлииллэрэ биллибит. Онно кистээн казино тэрилтэтин арыйан, билэр дьонун ккөрөн киллэрэргэ анаан видеокамералары туруорбуттар. Ыытыллыбыт үлэ түмүгүнэн, сүүйүүлээх оонньуулары тэрийэргэ туттуллар аппарааттар былдьаннылар, ол иһигэр: 50 көмпүүтэр, видекамералар,  коммутатор, мобильнай төлөпүөннэр уонна үп-харчы. Полиция үлэһиттэрэ сокуоннайа суох оонньууну тэрийиигэ уорбаланааччылары — 43 уонна 26 саастаах оонньуур саалалар администратордарын туппуттар. Билиҥҥи туругунан эспэртииһэ ыытыллар.