Дьокуускайга икки устудьуонтан киилэ кэриҥэ наркотигы былдьаатылар

Полиция үлэһиттэрэ 19 саастаах устудьуоннары киилэ кэриҥэ гашиһы атыылыы сатаабыттарыгар туттулар. ИДьМ пресс-сулууспата иһитиннэрэринэн, Дьокуускай куорат Покровскайдыыр суолугар суһал-көрдүүр тэрээһиннэри ыытар кэмнэригэр, омук массыынатын тохтотон, иһигэр олорбут 19 саастаах үрдүк үөрэх кыһаларын устудьуоннарын – суоппары уонна пассажиры туппуттар.

Эдэр дьону бэрэбиэркэлиир кэмнэригэр биирдэстэрин кууркатын тас сиэбиттэн 15 сууламмыт хараҥа өҥнөөх үүнээйиттэн оҥоһуллубут наркотик көстүбүт. Оттон массыына олорор сирдэрин икки ардынааҕы бардачогуттан эмиэ оннук икки бакыат булуллубут. Эспэртииһэ түмүгүнэн, былдьаммыт наркотик 800 граамтан тахса ыйааһыннаах гашиш буолара быһаарылынна.

Полиция үлэһиттэрэ быһаарбыттарынан, тутуллубут дьон тэриллиилээх бөлөх састаабыгар киирэллэр уонна интэриниэт нөҥүө наркотигы атыылыыр биир былаһааккаҕа наркотигы кистээн уурааччы (закладчик) үлэтин толороллор эбит. Бобуулаах наркотик бөдөҥ баартыйатын доҕордуулар кистэлэҥ сиртэн ылбыттар уонна аата биллибэт салайааччы (куратор) ыйыытынан бэйэлэрин массыыналарынан куорат таһыгар барбыттар. Онно кистэлэҥ сирдэри оҥорон, табаардары кистээн атыылыырга былааннаммыттар. Уорбаланааччыларга РФ Холуобунай кодексатын 30-с ыстатыйатын 3-с чааһынан уонна 228.1 ыстатыйатын 4-с чааһынан көрүллэр буруйу оҥоруу сибикилэринэн холуобунай дьыала тэрилиннэ. Дьыалаҕа эриллибит дьон хаайыыга угулуннулар. Полиция үлэһиттэрэ силиэдэбэтэллэри кытта буруйу оҥоруу бары быһыытын-майгытын, ону таһынан былдьаммыт наркотик хантан  уонна ханнык ханаалынан кэлбитин быһаараллар.