Дьокуускайга иккис оптуобуһунан айанныыр босхо буолуоҕа

Биир оптуобустан иккис оптуобуска көһөн айанныыр босхо буолуон сөп. Бу туһунан Дьокуускай куорат мээрэ Евгений Григорьев Саха сиригэр эрэгийиэни салайар киини кытта быһа эпиир кэмигэр (ЦУР Якутии) иһитиннэрдэ.

Мээр куоракка тэриллиэхтээх оптуобус маршрутун икки көрүҥүн туһунан кэпсээтэ. Өскөтүн күн бүгүн оптуобус икки барыйаана – куорат таһынааҕы уонна куорат иһинээҕи баар эбит буоллаҕына, инникитин магистральнай уонна “таһар” (“подвозящие”) маршруттар баар буолуохтара.

— Куораттар оптуобустара уокуруктары ситимниэхтэрэ, куорат иһигэр сылдьыахтара уонна бу оптуобустарга магистральнайдааҕар аҕыйах киһи киириэҕэ.

— магистральнай маршруттар төһө кыалларынан элбэх дьону таһыахтара. Холобур, бу билигин үлэлиир Мэдиссиинэ киинин уонна аэропорду ситимниир 100 нүөмэрдээх оптуобус маршрута.

— “Таһар” (“подвозящие”) маршруттар куорат периферийнэй учаастактарыттан магистральнай эбэтэр куорат маршруттарыгар олорсор туочукаларга диэри тиэрдэллэр.

— Куорат таһынааҕы маршруттар. Куорат хоту өттүттэн (Маҕан, Кангаласс, Жатай) аҕалар куорат таһынааҕы оптуобустар бары аэропорт оройуонугар диэри тиэрдиэхтэрэ, онтон дьон атын оптуобуска көһүөхтэрэ. Соҕуруу өттүттэн кэлэр (Табаҕа, Хатас) оптуобустар Мэдиссиинэ киинигэр диэри тиийиэхтэрэ. Салгыы атын оптуобустарга олорсуохтара.

“Хайа эрэ бириэмэ иһигэр босхо атын оптуобустарга олорсуохха сөп буолуо. Итиэннэ куорат таһынааҕы уонна куорат иһинээҕи оптуобустар төлөбүрдэрин биир гынарга”, — диэн Евгений Григорьев этэр.

Бу куорат таһыгар олорооччуларга ордук туһалаах буолуо. Кинилэр оптуобустар силбэһэр сирдэригэр диэри (до транспортного хаба) тиийэн баран, ыйыллыбыт 60 мүнүүтэ иһигэр куорат атын оптуобустарыгар босхо көһүөхтэрин сөп. Маныаха урукку курдук айан төлөбүрүн каартатын валидаторга даҕайар ирдэнэр.

Маршруттары оҥоһуллубут бырайыактарын https://yakutsk-transport.ru/ саайтка көрүөххэ сөп. Саайтка саҥа маршруттар туһунан бэйэҕит санааҕытын уонна этиилэргитин хаалларыаххытын сөп. Евгений Григорьевтыын быһа эпиири ыйыллыбыт сигэнэн көрүҥ: https://vk.com/wall710173374_4980

Саха сиригэр эрэгийиэни салайар киин муниципальнай тэриллиилэр баһылыктарын кытта суолталаах боппуруостарга тиһигин быспакка быһа эпиирдэри ыытар.