Дьокуускайга Ильмень уулуссаҕа дьаабылыка, акация, хаппырыас олортулар

Бу уулуссаҕа быйыл оҕо спортивнай оскуолалаах “Чыпчаал” элбэх өҥөнү оҥорор успуорт комплексын эбийиэгэ тутуллубута. «Азия оҕолоро» оонньуулар ыытыллар кэмигэр манна кыргыттарга волейбол күрэхтэһиитэ ыытыллыаҕа.

Бэлиэ түгэни көрсө Сайсары уокуругун Ильмень уулуссатыгар көҕөрдүү үлэтэ күүскэ бара турар. Көҕөрдүү үлэтигэр уонна көрүүгэ-харайыыга “Зеленый рай” экологическай хампаанньаны кытта  куорат дьаһалтата үс сыллаах хантараак түһэрсибит. Бу мастары таһынан сарбынньах уонна сирень ыарҕалары олордубуттар. 700 мас уонна сэппэрээк буору булбуттар. Салгыы Пирогов аатынан уулуссаны көҕөрдүүгэ үлэлэһиэхтэрэ, онно 800-чэкэ маһы, сэппэрээги олордуохтара.  Мантан салгыы “Зеленый рай” хампаанньа үлэһиттэрэ куорат болуоссаттарын сибэккинэн симиэхтэрэ.