Дьокуускайга инбэлиит буолбут байыастарга адаптивнай картодром оҥоһуллуон сөп

Былаас бэрэстэбиитэллэрэ, бырамыысыланнас хампаанньаларын салайааччылара уонна  байыаннай дьайыы кыттыылаахтара хамсанар кыахтарын сүтэрбит буойуннарга көмө оҥоруутун дьүүллэстилэр.

«Үрдүк технологиялаах мэдиссиинэ көмөтө» пуонда сэбиэтин бэрэссэдээтэлэ, Газпромбаан вице-бэрэсидьиэнэ Сергей Фурсенко Санкт-Петербургдааҕы Байыаннай-медицинскэй академия баазатыгар үлэлиир, сулууспаттан уурайбыт байыаннай сулууспалаахтарга көмөлөһөр картодрому билиһиннэрдэ. Кини мустубут дьону маннык адаптивнай бырайыагы Саха сиригэр тэрийэргэ ыҥырда.

«Биһиги картодромҥа бааһырбыт байыаннай дьайыы кыттыылаахтарын тута ыҥырабыт. Бу кинилэргэ үтүөрэн эрэр бастакы кэрдиистэригэр чөлүгэр түһэллэригэр кыаҕы биэрэр. Картиннар адаптивнайдар, илиинэн салайыллаллар. Трассанан сырсан, уолаттар адреналин ылаллар», – диэн Сергей Фурсенко кэпсээтэ.

Тыл эппит киһи бэлиэтээбитинэн, доруобуйаларынан хааччахтаах дьон картиҥҥа күрэхтэһэр кыахтанныннар диэн, Арассыыйатааҕы массыына федерациятын кытта кэпсэтиилэр ыытыллыбыттар. Картиннар уонна кинилэр симулятордарын аҕа дойдуга оҥорон таһаарыыны дьүүллэһэр былааннанар.

«Байыаннай дьайыыттан төннөн кэлэр уолаттар адаптивнай массыыналарынан сылдьалларын, суоппарынан үлэлииллэрин уонна дьиэ кэргэттэрин хааччыйалларын курдук, докумуон бүтүн бакыатын оҥоруохха наада. Бу – биһиги билигин үлэҕэ киллэрэр бырагыраамаларбыт бүтүн комплекстара. Буойуннары эрдэттэн чөлүгэр түһэрии барысыаһы биллэ чэпчэтиэ. Уолаттар бэйэлэрин кыһалҕаларыгар араастаан сыһыаннаһаллар. Кинилэргэ иккис олоҕу биэриэххэ наада, кинилэр иннилэрин диэки хамсыахтаахтар», – диэн Фурсенко  бэлиэтээтэ.