Дьокуускайга Индия киинэтин иккис бэстибээлэ буолан ааста

Алтынньы 13 күнүгэр Дьокуускайга Индия киинэтин иккис бэстибээлэр буолан ааста. Көрөөччүлэргэ «Лена» киинэ тыйаатырыгар «Пушкара» уонна «Милан Токиз» киинэлэри босхо көрдөрдүлэр.

Дойду биэс куоратыгар ыытыллар тэрээһин Арассыыйа уонна Индия култуурунай сыһыаннарын уонна доҕордуу сибээстэрин бөҕөргөтөргө аналлаах.

«Пушкара» (2023) киинэ «Надабинду» романтан олоҕуран оҥоһуллубут, онно Нилакантха диэн түөкүн киһи «Пушкара» диэн өлбүт киһи кэриэһигэр анаан ыытыллар үгэс буолбут сиэри-туому толорооччу буоларыгар тиийэрин кэпсиир. Киинэ олоҕу, култуураны уонна сүтэн эрэр үгэстиин алтыһар ураты таптал устуоруйатын дьиҥнээхтии көрдөрөр. Бу киинэ 71-с Национальнай киинэ бириэмийэтигэр бастыҥ одия уус-уран киинэтинэн ааттаммыта.

«Милан Токиз» (2019) киинэ сюжетын быһыытынан, Анирудх уонна кини доҕотторо сөбүлээн көрөн киинэ устуутунан дьарыктаналлар уонна устудьуоннарга эксээмэҥҥэ устарарга көмөлөһөр бөлөҕү салайаллар. Сүрүн дьоруой олоҕо Майтхилины көрсүбүтүн кэннэ уларыйар уонна кини уустук сиэр-майгы быһаарыныыларын кэмигэр таптал устуоруйата саҕаланар. Киинэлэр нууччалыы субтитрдардаахтар.

«Маннык трээһиннэрии ыытыы дойдулар икки ардыларыгар култуурунай бииргэ үлэлээһиҥҥэ уонна бэйэ-бэйэни байытыыга көмөлөһөр. Индия биһиги сүрүн  партнербут буолар. Саха сирин уонна Индия ыккардыларыгар ыкса доҕордуу сибээстэр сайдаллар. Бэстибээлгэ көрөөччүлэр айымньыттан саҥа өйдөбүллэри ылыахтарын сөп», – диэн СӨ Тас сибээскэ уонна норуоттар дьыалаларыгар миниистирин солбуйааччы Зинаида Николаева кэпсээтэ.

Бэстибээл алтынньы саҕаланыытыгар Москваҕа, Санкт-Петербурга уонна Казаҥҥа ыытыллыбыта. Алтынньы 15 күнүгэр Индия киинэлэрин Владивостокка көрдөрүөхтэрэ.

Санатан эттэххэ, Дьокуускайга Индия киинэтин көрдөрүүтэ бу иннинэ бэс ыйыгар буолбута. Индия киинэтин үһүс бэстибээлин Арассыыйаҕа кэлэр сылга ыытарга былаанныыллар.