Киин куоракка итирик дьахтар «Toyota Vitz» массыынанан теплотрассаҕа кэтиллибит

Ааспыт өрөбүл күннэргэ Дьокуускайга эчэйиитэ суох 15 суол быһылаана бэлиэтэннэ. Бу туһунан киин куорат ГАИ сулууспата иһитиннэрэр.

Ахсынньы 14 күнүгэр түүн Очиченко уулуссаҕа 4/1 №-дээх дьиэ аттыгар суол быһылаана таҕыста. 45 саастаах дьахтар «Toyota Vitz» массыынаны салайан иһэн, тепотрассаҕа кэтиллэ түспүтэ быһаарылынна.

Суол быһылаанын түмүгэр кини эчэйбэтэҕэ, ол эрээри итирик туруктааҕа биллибит. Итирик туругун бэрэбиэркэлээһин түмүгүнэн, тыынар салгыныгар 0,700 мг/л испиир көстүбүт.

Киниэхэ сыһыаннаан административнай боротокуол оҥоһулунна.
ГАИ санатар, итирик туруктаах массыынаны салайыы иһин суоппар 45 000 солк. ыстараапка тардыллар уонна 1,5-тан 2 сылга диэри салайар быраабыттан матар. Итирик туругу мэдиссиинискэй туоһулааһынтан аккаастаныы иһин эмиэ итинник эппиэтинэс көрүллэр. Өскөтүн суоппар итирик туруктаах иккиһин уруулга олордоҕуна, холуобунай эппиэтинэскэ тардыллар.