Дьокуускайга итирик суоппар оҕолорун эчэттэ

Дьокуускайга бүгүн, балаҕан ыйын 25 күнүгэр, сарсыарда аҕыс чаас саҕана 41 саастаах эр киһи «Тойота Суксид» массыынаҕа оҕолорун тиэйэн баран айаннаан испит.

Кини Сэбиэскэй Аармыйа 50 сыла уонна Рихард Зорге уулуссалар быһа охсуһууларыгар суолга утары тахсан «SEM655D» погрузчигы кытары харсыспыт. Саахал түмүгэр «Тойота Суксид» суоппара уонна кини аҕыстаах уонна уон алталаах оҕолоро эчэйии ылбыттар. Саахал кэмигэр суоппар да, оҕолор да сэрэхтээх буолуу курунан бааммакка олорбуттар. Мэдиссиинэ суһал көмөтүн массыыната эмсэҕэлээбит дьону балыыһаҕа илдьибит.

Бэрэбиэркэ быһаарбытынан, «Тойота Суксид» суоппара арыгы иһэн баран уруулга олорбута биллибит. Билигин бу дьыаланан бэрэбиэркэ ыытылла турарын туһунан ИДьМ Дьокуускайдааҕы ГИБДД салаата иһитиннэрдэ.