Дьокуускайга ититиини хаһан биэрэллэрий?

Дьокуускайга саҥа ититии сезонугар бэлэмнэнии үлэтэ барар. «Үлэ түргэтэтиллибит тэтиминэн бара турар», — диэн мэр Евгений Григорьев «Куораты кытта быһа эпиир» биэрии кэмигэр иһитиннэрдэ.

«Чуолаан, ититии систиэмэлэрин сайҕааһын олорор дьиэлэр 81-тан тахса бырыһыаннарыгар уонна социальнай эбийиэктэр 93 бырыһыаннарыгар түмүктэннэ. Үлэ ааспыт сыл бу кэминээҕэр түргэн тэтиминэн барда», — диэн Евгений Григорьев бэлиэтээтэ.

Мэрия иһитиннэрбитинэн, Дьокуускайга ититиини балаҕан ыйын 6 күнүгэр социальнай тэрилтэлэргэ, оттон балаҕан ыйын 15 күнүттэн — олорор дьиэлэринэн биэрэри былаанныыллар.

Ол да буоллар, ититиини биэрэр чопчу күнэ-дьыла салгын температуратыттан тутулуктаах буолуоҕа.

Санатан эттэххэ, ититиини үксүн орто сууккатааҕы салгын температурата +8 кыраадыстан аллара субуруччу биэс күн устата турдаҕына холбууллар.