Дьокуускайга Кангаласстыыр суолу аспааллаан эрэллэр

«Саха суоллара» тэрилтэ суол оҥорооччулара Дьокуускайга Кангаласстыыр суолу аспааллаан эрэллэр. 

Суолу оҥоруу «Куттала суох уонна хаачыстыбалаах суоллар» национальнай бырайыак чэрчитинэн оҥоһуллаллар. Бу туһунан СӨ Тырааныспарга уонна суол хаһаайыстыбатын миниистирин бастакы солбуйааччы Анатолий Потапов иһитиннэрдэ.

Кини бэлиэтииринэн, бу сылга суолу аспааллааһын көрүллүбэтэх, ол эрээри бэдэрээтчит түргэн тэтими ылан 6 км суолга аллараа хаттыгас аспаалы уурарга быһаарыммыт. Өрөспүүбүлүкэ суолларын хапытаалынай тутуутун управлениетыгар иһитиннэрбиттэринэн, суол оҥоһуутун сезона саҕаланыаҕыттан эбийиэккэ 12 ууну аһрдар турбалар үлэлэрэ оҥоһуллубут. Былаан быһыытынан 2026 сылга бары үлэ туттарыллыахтаах. Кангаласстыыр суол өрөспүүбүлүкэ суолларын тирэх ситимигэр киирсэр. Тоҕо диэтэххэ, манна  чох хостууллар, ону сэргэ «Кангалассы» диэн индустриальнай паарка баар.

РФ Бэрэсидьиэнэ Владимир Путин көҕүлээһининэн, «Куттала суох уонна хаачыстыбалаах суоллар»  национальнай бырайыак чэрчитинэн дойду 84 эрэгийиэнигэр суоллар оҥоһуллаллар. Бу дойду тырааныспарын инфраструктуратыгар улахан дьайыыны оҥорор. Саҥа аныгы магистраллар, муосталар тутуллаллар. Национальнай бырайыак сүрүн соруга — нэһилиэнньэ олоҕун хаачыстыбатын тупсарыы.