Дьокуускайга Көхтөөх уһун үйэлэнии киинэ тэриллиэҕэ
2024 сылга көхтөөх уһун үйэлэниини өйүүргэ муниципальнай бырагырааманы үбүлүүргэ 5 мөлүйүөн солкуобайы көрүөхтэрэ. Улуустарга күрэс биллэриллиэҕэ. Ону тэҥэ, көхтөөх уһун үйэлэнии киинэ тэриллиэҕэ. Ол туһунан үлэҕэ, социальнай сайдыыга министиэристибэтэ иһитиннэрэр.
Дбокуускайга Көхтөөх уһун үйэлэнии киинэ тэриллиэҕэ. Билигин сөптөөх дьиэни көрдүү сылдьаллар. Бу кииҥҥэ саастаах дьон алтыһарыгар усулуобуйа оҥоһуллуоҕа, маастар-кылаастары ыытыахтара, куруһуоктар буолуохтара. Ону тэҥэ, социальнай хайысхалаах Элбэх өҥөнү оҥорор киин аһыллыаҕа.
Көхтөөх уһун үйэлэнии киинигэр ким баҕалаах сылдьыан, дьарыктаныан сөп. Бу киин саастаах дьон дьиэҕэ олорон хаалбакка, бэйэ-бэйэлэрин кытта алтыһан, элбэххэ үөрэнэн, көхтөөх буолалларыгар, үйэлэрин уһаталларыгар туһуланар үлэни ыытыаҕа.
Ил Дархан Айсен Николаев Анал этиитигэр көхтөөх уһун үйэлэниини өйүүргэ соруктары биллэрбитэ. Билигин өрөспүүбүлүкэҕэ киһи олоҕун орто уһуна 73 сааска тэҥнэһэр, кэлэр 5 сылга 78 сааска диэри уһатар былааннаахтар. 2030 сылга киһи олоҕун орто уһуна 80 сааска тэҥнэһиэхтээх диэн соругу туруорбута.
Сообщить об опечатке
Текст, который будет отправлен нашим редакторам: