Дьокуускайга көмүс чаһыны уорбут дьахтар тутулунна

ИДьМ сулууспатын «Дьокуускайдааҕы» 2 №-дээх полиция отделын дьуһуурунай чааһыгар куорат олохтооҕуттан 30 тыһыынча солкуобай кэриҥэ сыаналаах көмүс чаһы уоруллубутун туһунан сайабылыанньа киирбит. Бу туһунан Саха сиринээҕи ИДьМ пресс-сулууспата иһитиннэрэр.

Суһал-көрдүүр тэрээһиннэринэн полиция үлэһиттэрэ уорбаланааччыны быһаарбыттар. Уорбаланааччы 31 саастаах  дьахтар буолара биллибит. Силиэстийэнэн быһаарыллыбытынан, буруйу оҥорбут дьахтар эмсэҕэлээччигэ ыалдьыттыы сылдьан, түгэнинэн туһанан, сервантан көмүс чаһыны кистээн уорбут. Кэлин уорбаланааччы чаһыны ломбардка туттарбыт, ол кэннэ харчыны бэйэтин наадатыгар туһаммыт. Уоруллубут мал былдьанна. РФ Холуобунай кодексатын 158-с ыстатыйатын 2-с чааһынан («Уоруу») холуобунай дьыала тэрилиннэ. Дьахтар биэс сылга диэри көҥүлэ быһыллыан сөп.