Хаартыска: sakha.gov.ru
Дьокуускайга алтынньы 20 күнүгэр «Арктика» атыы-логистика хампаанньатын «АрктикВкус» диэн саҥа кэнсиэрбэ оҥорор сыаҕа аһылынна. Бу тэрилтэ олохтоох тыа хаһаайыстыбатын бородууксуйатын, ол иһигэр Арктика улуустарыттн хомуллар айылҕа үүнээйитин, астыыр-таҥастыыр ситим сүрүн сүһүөҕүнэн буолуоҕа, диэн www.sakha.gov.ru иһитиннэрэр.
Собуот хампаанньа атыы-логистика кииннэрин баазатыгар үлэлиэҕэ, убаһаны көдьүүстээхтик астаан-таҥастаан таһаарыҕа. Бу суолталаах эбийиэк аһыллыытынан СӨ Ил Дархана Айсен Николаев эҕэрдэлээтэ.
«„Арктика“ атыы-логистика хампаанньатын (АТЛК) иннигэр хоту таһаҕаһы тиэйиини чэпчэтэр уонна олохтоох оҥорон таһаарааччылары бары өттүнэн өйүүр инниттэн бородууксуйаны астыыры-таҥастыыры хааччыйар сорук туруоруллубута. АТЛК саҥа кэнсиэрбэ оҥорор сыаҕа тыа хаһаайыстыбатын бородууксуйатын астыыр-таҥастыыр уонна тиэйэр-таһар систиэмэҕэ суолталаах сүһүөҕүнэн буолуоҕа. Олохтоох убаһаны туһаныыга ураты болҕомто ууруллуоҕа, бу бородууксуйа үрдүк хаачыстыбатын уонна олохтоох оҥорон таһаарааччыларга өйөбүлү хааччыйыаҕа.
Оҥорон таһаарыыга туттуллар айылҕа үүнээйитэ Арктика улуустарыттан, ол иһигэр Өймөкөөн уонна Эдьигээн оройуоннарыттан, кэлиэҕэ. Бу үгэс Саха сирин атын Арктика улуустарыгар эмиэ тарҕаныаҕа. Ону таһынан, Хоту сиргэ өрүс уҥуоргу улуустар аграрийдарын астаммыт-таҥастаммыт бородууксуйата тиийиэҕэ. Сых үлэтэ тыа хаһаайыстыбатын сайдыытыгар уонна Арктика олохтоохторун олоҕун хаачыстыбата тупсарыгар көмөлөһүөҕэ», – диэн Айсен Николаев бэлиэтээтэ.
«Арктика» атыы-логистика хампаанньатын генеральнай дириэктэрэ Сайдам Степанов сыах кыамтата эт кэнсиэрбэлэрин оҥорууга сылга 250 тыһыынча бааҥка буоларын, бу 2025 сыл бүтүөр диэри 55 тыһыынча бааҥканы оҥорон таһаарар былааннаахтарын дакылааттаата.
«Оттон оҕуруот аһын уонна уулаах отон кэнсиэрбэлэрин оҥоруу былаана – сылга уопсайа 120 тыһыынча бааҥка. Отон кэнсиэрбэлэрин кээмэйэ Арктика улуустарынан баар атыы-логистика кииннэрин бэлэмниир пууннарыгар төһө кээмэйдээх айылҕа үүнээйитэ туттарылларыттан тутулуктаах буолуоҕа», — диэн кини эбэн эттэ.
Сайдам Степанов сыах бары дьиэлэрэ технологическай бырассыастар ситимнэри учуоттаан бырайыактаммыттарын, бу үлэни баарынан көдьүүстээхтик тэрийэргэ уонна бириэмэ ороскуотун аччатарга кыах биэрэрин иһитиннэрдэ. Сүрүн элэмиэннэринэн аныгы конвейернай тииптээх технологическай тэриллэр, ону таһынан собуот кэмпилиэктээх автоклав буоллулар. Бу быһаарыылар үлэ көдьүүһүн үрдэппитин таһынан, бары бырассыастары үрдүк таһымҥа автоматизациялыыры хааччыйаллар.
Оҥорон таһаарар собуот бородууксуйа хаачыстыбатын кэлим хонтуруолун ааспыт, тахсар бородууксуйа кытаанах ыстандаартарга эппиэттиирин мэктиэлиир. Производственнай комплекс үлэҕэ киириитэ олохтоох оҥорон таһаарыы кээмэйин, ол иһигэр хоту таһаҕаһы тиэйиигэ анаммыт табаардары, улаатыннарарга кыах биэриэҕэ.
Санатан эттэххэ, быйыл өрөспүүбүлүкэ 13 Арктика улуустарыгар барытыгар АЛК-лар СӨ Ил Дарханын «Саха Өрөспүүбүлүкэтин Арктикатааҕы зонатын 2035 сылга диэри социальнай-экэнэмиичэскэй сайыннарыы Стратегиятын туһунан» ыйааҕынан уонна өрөспүүбүлүкэ Бырабыыталыстыбата Арассыыйа Илин сайдыытын министиэристибэтин кытта түһэрсибит сөбүлэҥинэн үлэҕэ киириэхтэрэ.
Ахсынньы 7 күнүгэр Оһуокай куоракка олорор Бүлүү улууһун олохтоохторугар ананна. Куоракка олорор Бүлүү улууһуттан төрүттээх…
Дьүөгэм, Үп министерствотыгар таһаарыылаахтык үлэлээбит Анна Романовна Винокурова бочуоттаах сынньалаҥҥа олорор. Бу күннэргэ Дубайга олорор…
Аныгы сайдыылаах үйэбитигэр өрөспүүбүлүкэбит хайа да муннугар аны хаалыылаах, түҥкэтэх сир диэн суох. Бээ, бу…
Уһун, тымныы кыһыннаах, тыйыс айылҕалаах хоту дойдуга олорор буоланнар, өбүгэлэрбит барахсаттар күөх сайын уунар уйгутуттан…
Амма улууһун Соморсун нэһилиэгэр үлэһит тырахтарыыс уолаттар, эр дьон баар буоланнар, дэриэбинэ олоҕо күөстүү оргуйар.…
"Амма" эрэгийиэннээҕи айан суолун 93-94 км учаастагар билигин да күөлтэн уу киирэ турар. "СУ-77" тэрилтэ…