Дьокуускайга көҥүл тустууга чөмпүйэнээт кыайыылаахтара быһаарылыннылар

Алтынньы 25 күнүгэр «Кыайыы 50 сыла»  успуорт дыбарыаһыгар эр дьоҥҥо көҥүл тустууга Дьокуускайга аһаҕас чөмпүйэнээт ыытылынна.

Бу күрэхтэһии саха тустууктарыгар Дмитрий Коркин аатынан норуоттар икки ардыларынааҕы турнир иннинэ бэлэмнэнии түһүмэҕинэн буолла, диэн ЯСИА иһитиннэрэр.

Күрэхтэһиигэ Саха сирин сүүмэрдэммит хамаандатын бастыҥнара кыттан, аҕыс ыйааһын категориятыгар күүстээхтэри быһаарыстылар. Кыайыылаахтарынан буоллулар: Любомир Ашеин (57 кг), Егор Явловский (61 кг), Артём Слепцов (65 кг), Василий Григорьев (70 кг), Игорь Матвеев (74 кг), Айсен Потапов (79 кг), Роман Николаев (86 кг) уонна Никита Софронов (86 кг үөһэ).

Дьокуускай куорат чөмпүйэнээтэ аһаҕас быһыылаахтык ыытылынна, онон  киин куорат тустууктара эрэ буолбакка, атын оройуоннар уонна хамаандалар бэрэстэбиитэллэрэ эмиэ кытыннылар.

Санатан эттэххэ, сүүрбэ хонугунан, сэтинньи 15-16 күннэригэр, «Триумф» успуорт комплексыгар легендарнай тириэньэр Дмитрий Коркин кэриэһигэр анаммыт көҥүл тустууга норуоттар икки ардыларынааҕы турнир ыытыллыаҕа.