Дьокуускайга кэргэнниилэр көҥүлэ суох онлайн-казино тэрийэн сууттаннылар

Икки сыл устата, 2022 сыл бэс ыйыттан 2024 сыл олунньутугар диэри, 8 киһилээх бөлөх Дьокуускай куоракка сокуону кэһэн,  онлайн-казино тэрийбит.

Сүрүн көҕүлээччилэринэн кэргэнниилэр буолаллара быһаарыллыбыт. Кинилэр билэр дьоннорун кыттыһаннаран, буруйу оҥорор бөлөххө оруоллары үллэрбиттэр: оонньуур саала салайааччыта, кассир-дьаһайааччы уонна харабыл. Сокуоннайа суох барыыс киллэринээри, дьиэни куортамнаабыттар, онлайн-казино саайтарыгар үлэлииргэ туруоруллубут көмпүүтэрдэри олордубуттар. Сокуону кэһэн үлэлиир кэмнэригэр, оонньуур тэрили уонна куйаар ситимин туһанан, буруйу оҥорор бөлөх уопсайа 21 мөл. солк. тахса дохуоту киллэриммит.

Дьокуускайдааҕы куорат суута кыттааччылары барыларын РФ Холуобунай Кодексатын 171.2 ыстатыйатын 3-с чааһыгар көрүллүбүт буруйу оҥорууга («Тэрилээх бөлөҕүнэн, бөдөҥ кээмэйдээх дохуоту киллэринэн, сүүйүүлээх оонньуулары сокуоннайа суох тэрийии уонна ыытыы») буруйдаахтарынан билиннэ. Бары кыттааччыларга 2 сыл 6 ыйга болдьоххо усулуобунайдык көҥүллэрин быһарга ананан, 300 тыһ. солк. саҕалаан 200 тыһ. солк. диэри ыстараап  олохтонно. Ону таһынан, 2 сыл болдьоххо сүүйүүлээх оонньуулары тэрийиинэн дьарыктанар бырааптара быһылынна.

СӨ Үрдүкү Суута дьыала матырыйаалларын көрөн, өрүттэр санааларын истэн баран, буруйу сыаналааһыҥҥа уонна анаммыт накаастабыл чааһыгар сөбүлэстэ. Суут быһаарыыта уларытыыта суох хаалларылынна уонна сокуоннай күүһүгэр киирдэ. Бу туһунан Саха сиринээҕи Үрдүкү Суут пресс-сулууспата иһитиннэрэр.