Дьокуускайга Кэриэйдэр төрүччүлэрин үөрэтиигэ пуорум саҕаланна

Бүгүн, ыам  ыйын 31 күнүгэр,  Кэриэйдэр төрүччүлэрин үөрэтиигэ анаммыт норуоттар икки ардыларынааҕы пуорум буола турар.

Пуорум кэриэй тылынан ырыаны толоруунан бэрт интэриэһинэйдик саҕаланна. Ол курдук, култуураҕа уонна духуобунай сайдыыга миниистирин солбуйааччы Марина Силина ырыатын ытыс доҕуһуолунан көрүстүлэр.

Бэйэлэрин төрүттэрин туһунан кэпсээри үгүс киһи мустубут. Национальнай таҥастарын кэппиттэрэ олус үчүгэй. Пуорум кыттыылаахтарын Хасанова-Люгай Светлана Дженишевна (Москва), РНА СС Гуманитарнай чинчийиилэргэ уонна хоту дойду аҕыйах ахсааннаах норуоттарын институтун дириэктэрэ Сардаана Боякова эҕэрдэлээтилэр.  Төрүччүнү үөрэтии суолтатын туһунан эттилэр.

1910-1930 сс. саха-кэриэйдэрин туһунан «Саха-корейцы» ХЭТ -тэн Егорова-ТХЭ Валерия дакылаатын бастакынан иһиттилэр. Валерия Ивановна этэринэн, Саха сиригэр кэлэн үлэлээбит кэриэйдэр олорбут улуустарыттан бэрэстэбиитэллэр кэлбиттэрин аҕынна. Ол курдук, Амма, Мэҥэ Хаҥалас, Уус Алдан, Чурапчы, Нам, Хаҥалас, Сунтаар, Үөһээ Бүлүү, Ньурба, Горнай, Өлүөхүмэ, Томпо, Алдан, Дьокуускай к.

Кини Н.Г. Иванов научнай чинчийиитин үтүө тылынан бэлиэтээтэ. Онно кэриэйдэр хайдах курдук оҕуруот аһын үүннэриигэ, көмүстээх бириискэлэргэ үлэлээбиттэрин, гражданскай сэриигэ кыттыбыттарын эҥин үөрэппит.

— Мин Сеуллааҕы университет аспиранткатыгар Цой-Румянцева Сардаана Семеновнаҕа эһэм Тхэ Мин Сон улахан уолун туһунан чахчылары булбутун иһин махтанабын. Ону тэҥэ Соҕуруу Кореяттан ыалдьыппытыгар Пэ Санг Донга уонна Хан Татиана Афанасьевнаҕа. Кинилэр Бойобуой албан аат түмэлигэр Тхэ Мин Сон эһэм уола буоларын туоһулуур докумуоннары буллулар»,— диэтэ В.Егорова-Тхэ.

Салгыы Дьокуускайга баар кэриэйдэр Ассоциацияларын, Сэбиэскэй кэминээҕи чинчийиилэр тустарынан уо.да. дакылааттары иһиттилэр. Пуорум үлэтэ салҕанар.