Дьокуускайга көтөн испит сөмөлүөт Красноярскай аэропордугар түстэ

«Якутия» АХ Новосибирскайтан Дьокуускайга көтөн  испит  сөмөлүөтэ  Красноярскай пордугар кэлэн түспүтүн туһунан ЯСИА суруйар. Ол курдук сөмөлүөт солуонугар дабылыанньа намтаан, экипаж аара Красноярскайга түһэр туһунан быһаарыныы  ылыммыт. 

Тохсунньу 22 күнүгэр олохтоох бириэмэнэн  23:08 ч.  Москва – Новосибирскай – Дьокуускай хайысханан   466  нүөмэрдээх рейс  Новосибирскай аэропордуттан көппүт. Биир чаас курдук буолан баран,   сөмөлүөт солуонугар дабылыанньа намтааһына  бэлиэтээммитин  туһунан «Якутия» АХ иһитиннэрдэ.

Билигин авиационнай  быһылааны чинчийиигэ МТУ Росавиация хамыыһыйата ананна. Барыллааһын быһыытынан,  салгын дабылыанньатын улаатыннарар систиэмэ клапана  (клапан системы наддува воздушного судна)  мууһуран дабылыанньа намтаабыт. Быһылаан  туохтан тахсыбыта  хамыыһыйа үлэтин түмүгүнэн биллиэҕэ.

Билигин атын суудуна Москваттан (Внуково) Красноярскайга көппүт. Онон, пассажирдар Красноярскайтан олохтоох бириэмэнэн 13:40 ч. көтүөхтэрэ.

Авиахампаанньа Красноярскайга рейси оҥорбот буолан, туһааннаах куоракка бэрэстэбиитэллэрэ суох эбит. Пассажирдар кэмигэр уунан, итии аһылыгынан   хааччылыннылар диэн хампаанньа иһитиннэрдэ.