Дьокуускай киинигэр киһи өлүүлээх баһаар дьыалатынан үс киһи сууттанна

Дьокуускайга административнай дьиэҕэ тахсыбыт киһи өлүүлээх баһаар холуобунай дьыалатыгар бириигэбэри таһаардылар. Бу туһунан ахсынньы 16 күнүгэр СӨ Борокуратуурата иһитиннэрдэ.

2023 сыл алтынньытыгар  баһаар түмүгэр буруоҕа тумнастан икки киһи өлбүт уонна өссө икки киһи доруобуйатыгар улахан эчэйиини ылбыт.

«Дьокуускай куорат борокуратуурата үс киһиэхэ сыһыаннаах холуобунай дьыалаҕа судаарыстыбаннай буруйдааһыны өйөөтө. Кинилэр РФ Холуобунай кодексатын 219-с ыстатыйатын 3-с чааһынан, 118-с ыстатыйатын 1-кы чааһынан уонна 109-с ыстатыйатын 3-с чааһынан сууттаннылар», — диэн биэдэмистибэ иһитиннэриитигэр этиллэр.

Суут кэмигэр быһаарыллыбытынан, Ленин проспегар баар административнай дьиэҕэ баһаар дьиэ бас билээччитэ, салайааччы уонна төрдүс этээскэ  хоһу куортамнааччы баһаартан сэрэхтээх буолуу быраабылаларын кэспиттэриттэн тахсыбыт. Дьиэ бас билээччитэ — үс сылга, салайааччы — үс сыл үс ыйга көҥүллэрэ быһылынна. Оттон хоһу куортамнаабыт дьахтар икки сылга көҥүлэ быһылынна. Суут быһаарыытынан эмсэҕэлээччилэр «Сигма» хампаанньаттан уонна сууттаммыт дьонтон уопсайа 16 мөл. солкуобайы ылыахтара. Бириигэбэр сокуоннай күүһүгэр киирэ илик.