Киин куоракка киһи өлүүлээх суол саахала тахсыбыт

Дьокуускайга суол саахалын түмүгэр дьахтар тыына быстыбыт. Бу туһунан киин куорат Госавтоинспекциятын пресс-сулууспата иһитиннэрэр.

Барыллаан быһаарыллыбытынан, атырдьах ыйын 18 күнүгэр түүн 2 чаас саҕана «Nissan Tiida» массыына суоппара «Автострада 50 лет Октября» уулуссанан айаннаан иһэн, уулусса сырдатар остуолбатыгар кэтиллибит. Суол быһылаанын түмүгэр 1988 сыллаах төрүөх дьахтар ылбыт эчэйиилэриттэн суһал көмө массыынатыгар тыына быстыбыт.

Оттон 1982 сыллаах төрүөх эр киһи эчэйии ылан, балыыһаҕа киллэриллибит. Бу чахчынан матырыйааллар силиэстийэлиир уорганнарга бэрилиннилэр. Быһылаан төрүөтүн быһаарарга бэрэбиэркэ ыытыллар.