Дьокуускайга киинэ павильонун тутар сир быһаарылынна

Киинэ павильона тутулларын туһунан үөрүүлээх сонун тарҕаммыта балачча ыраата оҕуста. Билигин, аны, Дьокуускай куорат 68-с түөлбэтигэр тутуллара быһаарыллыбыт.

Иһитиннэрбиттэринэн, манна киинэни устуунан эрэ муҥурдамматтар, Саха сиригэр, Уһук Илин уокуругар уонна Илин Сибииргэ бу хайысхаҕа үлэни күүскэ хааччыйар сорук турар. Бу туһунан бүгүн, сэтинньи 6 күнүгэр, Ил Дархан Айсен Николаев мунньахха иһитиннэрбит.

Ил Дархан Айсен Николаев Саха сирин киинэлэрэ киэҥник биллэр-көстөр буолбуттарыгар киинэ хампаанньаларын үлэлэрэ оруоллаахтарын бэлиэтээбит. Маннык павильоннар Москваҕа, Санкт-Петербурга эрэ баалларын, итиэннэ эбийиэги тэрийии — киинэ сайдыытыгар, уопсайынан саха култууратын сайыннарыыга бигэ тирэх буоларын ыйбыт. Оттон эбийиэги тутууну 2025 сылтан саҕалыыр былааннаахтар.

«Ил Дархан Айсен Николаев киинэ индустриятын тэрийии, сайыннарыы экэниэмикэҕэ оруоллаах буоларын ыйар.Биһиги киинэ павильона олохтоох киинэни устааччылары сэргэ, атын эрэгийиэннэр бэрэстэбиитэллэрин болҕомтолорун эмиэ тардарыгар, угуйарыгар баҕарабыт. Киинэни устан, оҥорон таһаарыыны таһынан, өссө бу туризмы сайыннарыыга эмиэ оруоллаах буолуоҕа», — диэн СӨ Инновацияҕа, сыыппара сайдыытыгар уонна инфокоммуникация технологиятын миниистирэ Василий Ефимов этэр.

Дьокуускайга элбэх хайысханы толорор киинэ павильона Уһук Илиҥҥэ соҕотох киининэн буолуо уонна киинэ хайысхатыгар үлэлэһээччилэргэ усулуобуйаны тэрийиэ.