Дьокуускайга клещка ытыттарыы 2 төгүл кэриҥэ элбээтэ

Сайын саҕаланыаҕыттан Дьокуускайга 47 киһи клещка ытыттарда. Бу ааспыт сыл кытта тэҥнээтэххэ (27) икки төгүл кэриҥэ элбэх. Бу иһитиннэрии от ыйын 28 күнүгэр киин куорат уопсай планеркатыгар этилиннэ.

Ааспыт нэдиэлэҕэ Дьокуускайга клещ киһиэхэ сыстыбыт биир түбэлтэтэ бэлиэтэннэ. Сирдэринэн ыллахха, ытырыы Жатай бөһүөлэгин даачаларыгар, Хатыҥ-Үрэх шоссеҕа, Бүлүүлүүр тракт 14-с км, Покровскайдыыр тракка, «Тускул» түөлбэҕэ, Үс Хатыҥ сиригэр-уотугар, Маҕан бөһүөлэк таһынааҕы күөлгэ уонна да атын сирдэргэ бэлиэтэннэ.

Эмсэҕэлээбит дьон барыларыгар клещтан утары иммуноглобулинынан быһыы оҥоһулунна. Роспотребнадзор бүтэһик дааннайынан, өрөспүүбүлүкэҕэ уопсайа 610-тан тахса киһи клещка ытыттарда. Ордук элбэх түбэлтэ Ленскэйгэ – 289, Алдаҥҥа – 110 уонна Нерюнгри оройуоннарыгар – 84 бэлиэтэннэ.