Дьокуускайга култуура волонтердарыгар пуорум ыытыллар

Дьокуускайга хас да сүүс кыттааччыны түмпүт култуура волонтердарын өрөспүүбүлүкэтээҕи пуорума ыытыллар. Тэрээһин 2020 сыл кэнниттэн иккис төгүлүн буолла.

Икки күн устата кыттааччылар федеральнай эспиэрдэри кытта култуура эйгэтигэр добровольчество сайдыытын саҥа стратегияларын ырытыахтара.

Бастакы күн бырагыраамаҕа Smart-бибилиэтиэкэ баазатыгар теоретическай дьарыктар уонна маастар-кылаастар киирэллэр. Ону таһынан, кыттааччылар «Биһигини сомоҕолуур» диэн ааттаах уопсай хартыыналарын үлэтин саҕалаатылар.

Иккис күҥҥэ Национальнай художественнай уонна Дьокуускайдааҕы түмэллэргэ практическай чааһа, ону тэҥэ архыыпка үлэ былааннанар. Дьыалабыай бырагыраамаҕа – федеральнай эспиэрдэр Сергей Гошкалевы уонна Милена Богданованы кытта көрсүһүүлэр.

Пуорумҥа 2030 сылга диэри култуураҕа добровольчество сайдыытын стратегиятын дьүүллэһиэхтэрэ.

«Бүгүн, култуура волонтердарын өрөспүүбүлүкэтээҕи пуорумун күннэригэр, биһиэхэ култуура тэрилтэлэрин, идэлээх үрдүк уонна орто үөрэх кыһаларын устудьуоннарын, ону таһынан биһиги түмсүүбүтүгэр өрдөөҕүттэн баар волонтердары сайдыы саҥа хайысхатыгар, саҥа стратегияҕа – 2030 сылга диэри хайдах үлэлиэхпитин-хамсыахпытын уһуйарбыт олус суолталаах. Ону тэҥэ, саҥа стратегия чэрчитинэн манна, өрөспүүбүлүкэҕэ, ханнык көҕүлээһиннэр уонна бырайыактар сайдыахтарын сөбүн өйдүүр эмиэ наадалаах», — диэн Бүтүн Арассыыйатааҕы «Култуура волонтердара» хамсааһын салайааччыта Милена Богданова бэлиэтээтэ.

Өрөспүүбүлүкэ култууратын уонна духуобунай сайдыытын миниистирин бастакы солбуйааччы Мария Турантаева кэпсээбитинэн, пуорум уопуттаах волонтердары да, саҥа кыттааччылары да түмтэ. Тэрээһиҥҥэ 500-тэн тахса киһи кыттара күүтүллэр.

«Култуура волонтердара, бары волонтердар курдук, биир сыаллаахтар – бу үтүө дьыала туһугар көмөлөһүү буолар. Култуура туһунан эттэххэ, биһиэхэ ол киэҥник өйдөнөр уонна нэһилиэнньэ бары араҥатын таарыйар. Ол эрээри, холобур, култуурунай тэрээһиннэр чэрчитинэн эрэ сыаналыа суохтаахпыт –  уопсайынан биһиги олохпут сорҕото буолар. Ону таһынан, биһиэхэ сүрдээх бөдөҥ тэрээһиннэр ыытыллаллар. Холобур, пуорумнар, бөдөҥ быыстапкалар,  араас тэрээһиннэр. Онно сүрэхтэрин баҕатынан көмөҕө кэлэр дьон көмөтө суох сатаммат», — диэн Мария Турантаева бэлиэтээтэ.

Санаттахха, Саха сиригэр 4 тыһыынча кэриҥэ култуура волонтера баар. Хамсааһын эрэгийиэҥҥэ 2019 сылтан көхтөөхтүк үлэлиир, «Азия оҕолоро»  оонньуулар курдук бөдөҥ тэрээһиннэри тэрийиигэ көмөлөһөр уонна бэйэтин бырайыактарын олоххо киллэрэр.