Дьокуускайга кулун тутар ыйтан гаас оборудованиетын тэхиниичэскэй көрүүтүн сыаната намтыаҕа

Киин куоракка гаас оборудованиетын тэхиниичэскэй көрүүтүн өҥөтүн оҥоруу сыанатын кулун тутар ыйтан намтатар былааннанар.

Ол туһунан Дьокуускай баһылыга Евгений Григорьев олунньу 3 күнүгэр Дьокуускай куорат мэриятын планеркатыгар иһитиннэрдэ.

«Табаҕаҕа уонна куорат таһынааҕы бөһүөлэктэргэ куорат баһылыгын нэһилиэнньэ иннигэр отчуотун кэмигэр, олохтоохтор гаас оборудованиетын уонна гаас билиитэтин тэхиниичэскэй көрүүтүн өҥөтүн сыаната үрдээбитин туһунан биллэрбиттэрэ. Отчуот кэннэ «Сахатранснефтегаз» хампаанньаны кытта кэпсэттим, онон кулун тутар ыйтан сыананы намтатарга уларыйыы киириэҕэ диэн иһитиннэрдилэр», — диэтэ Евгений Григорьев.

Санатан эттэххэ, Саха сиригэр гааһынан хааччыйар соҕотох тэрилтэнэн «Сахатранснефтегаз» АХ буолар. Атын тэрилтэлэр гаас оборудованиетын тэхиниичэскэй көрүүтүн ыытарга дуогабары түһэрсэр бырааптара тохтотуллубута.