Дьокуускай куоракка 10 суол саахала тахсыбыт

Нэдиэлэ саҕаланыаҕыттан Дьокуускай куоракка 10 суол саахала тахсыбыт, биир киһи эмсэҕэлээбит. Бу туһунан Госавтоинспекция пресс-сулууспата суруйар.

Можайскай аатынан уулуссаҕа 27А №-дээх дьиэтин таһыгар «Honda Fit» массыына 41 саастаах суоппара 39 саастаах эр киһини түҥнэри көппүт. Уҥуох тостуулаах, араас эчэйиини ылбыт эмсэҕэлээччи балыыһаҕа киирбит. Госавтоинспекция үлэһиттэрэ 4 итирик туруктаах суоппары туппуттар.

Киэһэ 20.00 чаас саҕана Киров аатынан уулусса 34 №-дээх дьиэтин таһыгар «Toyota Land Cruiser» массыына «Subaru Forester» массыынаны кытта харсыспыт. «Toyota Land Cruiser» соуппара саахал тахсыбыт сириттэн куоппут. Кэлин суоппары туппуттар, кини итирик туруктаах уруулга олорбута быһаарыллыбыт.

Госавтоинспекция санатар, итирик туруктаах сылдьан тырааныспарга олорбут суоппар 45000 солк. суумалаах административнай ыстараапка тардыллар эбэтэр 1,5 сылга диэри болдьоххо тырааныспары ыытар бырааба быһыллар.