Хаартыска: Дьокуускай куорат дьаһалтата
Дьокуускай куорат баһылыга Евгений Григорьев Куорат күнүн ыытыыга тэрийэр кэмитиэт мунньаҕын ыытта.
Балаҕан ыйын иккис өрөбүлүгэр Дьокуускай төрүттэммитэ 393 сыла туолар. Бу туһунан Дьокуускай куорат дьаһалтатын пресс-сулууспата иһитиннэрэр.
Куорат күнүгэр аналлаах сүрүн тэрээһиннэр балаҕан ыйын 13-14 күннэригэр буолуохтара. Ол гынан баран, уокуруктарга уонна куорат таһынааҕы нэһилиэктэргэ бырааһынньыктааҕы тэрээһиннэр балаҕан ыйын 8-12 күннэриттэн саҕаланыахтара.
Тэрээһиннэр бырагыраамаларын туһунан Култуура уонна духуобунай сайдыы управлениетын начаалынньыга Сардана Брызгалова билиһиннэрдэ. Быйыл сүрүн үөрүүлээх тэрээһиннэр 5 былаһааккаҕа ыытыллыахтара. Барыта “Якутск – город твоих побед” диэн тиэмэнэн ыытыллар уонна Арассыыйаҕа Аҕа дойду көмүскээччилэр сылыгар, Саха сиригэр Ийэ дойду көмүскээччилэр сылыгар, Аҕа дойду Улуу сэриитигэр Кыайыы 80 сылыгар уонна Иккис аан дойду сэриитигэр анаммыт 40-тан тахса тэрээһин былааннанар.
Үөрүүлээх тэрээһиннэр сүрүнэ Өрөспүүбүлүкэ болуоссатыгар буолуохтара – манна үгэс быһыытынан куорат олохтоохторун, эдэр ыаллары эҕэрдэлиэхтэрэ, саха эстрадатын артыыстарын бырааһынньыктааҕы кэнсиэрэ ыытыллыахтара.
Эргэ куоракка «Устуоруйалаах Дьокуускай» бырагыраама тэриллиэҕэ, онно быыстапка-дьаарбаҥкалар, уус-уран самодеятельность артыыстарын кэнсиэрдэрэ, куонкурустар уонна квест-оонньуулар буолуохтара.
Доҕордоһуу болуоссатыгар «Дьокуускай – доҕордоһуу куората» диэн ыҥырыылаах национальнай таҥастаах «Этно-Ран» сүүрүүтэ, үгэс буолбут оһуокай, олохтоох оҥорон таһаарыы быыстапка-дьаарбаҥката, оонньуулар тэриллиэхтэрэ.
Култуура уонна сынньалаҥ пааркатыгар «Дьокуускай – кэскил куората» диэн ааттаах тэрээһиннэр бырагыраамата үксүн оҕолорго ананыаҕа. Ону таһынан, пааркаҕа Куорат күнүгэр аналлаах илиинэн оҥоһуктар быыстапкалаах, маастар-кылаастардаах дьаарбаҥка аһыллыаҕа.
Кыайыы пааркатыгар «Дьокуускай – үлэ килбиэнин куората» диэн киэҥ далааһыннаах бырааһынньыктааҕы бырагыраама былааннанар. Тэрийэр кэмитиэт мунньаҕар куораты 393 сылыгар киэргэтии туһунан Куорат тутуутун уонна архитектуратын департаменын куорат эйгэтин отделын салайааччыта Егор Чемезов иһитиннэрдэ. Үлэҕэ департаменын начаалынньыга Светлана Кармадонова Куорат күнүгэр сири-уоту тупсарыы туһунан кэпсээтэ. Евгений Григорьев куорат сирин-уотун, ордук уопсастыбаннай сирдэри, пааматынньыктары, дьон мустар сирдэрин хомуйуу үлэтин күүһүрдэргэ сорудахтаата.
«ВИС» бөлөх Өлүөнэ өрүс нөҥүө күргэни тутууга үлэни тэнитэр. Бүгүн коффердамнары туруорарга уонна өрүс ортотунааҕы…
Олунньу 14 күнүгэр Саха сирин Ытык кырдьаҕаһа, тыыл бэтэрээнэ Федора Николаевна Иванова 104 сааһын туолла.…
Аҕа дойдуну көмүскээччилэр күннэригэр диэри биир нэдиэлэттэн эрэ ордук кэм хаалла. Дьокуускайтан байыаннай дьайыы зонатыгар…
Өрөспүүбүлүкэҕэ суукка иһигэр 4 буруйу оҥоруу туһунан иһитиннэрии киирдэ, диэн СӨ дьуһуурунай борокуруора биллэрэр. Дьокуускай…
Уус Алдан улууһун Найахы иистэнэр уран тарбахтаах далбар хотуттара дойду көмүскэлигэр сылдьар буойуннарга анаан таҥас,…
Сыл аайы олунньу 15 күнүгэр Арассыыйаҕа Аҕа дойду тас өттүгэр ытык иэстэрин толорбут интернационалист буойуттар…