Дьокуускайга куораттааҕы маршрукка саҥа оптуобустар тахсыахтара

Дьокуускай куорат баһылыга Евгений Григорьев автотиэхиньикэни регистрациялааһыны уонна хааччыйыыны түргэтэтэргэ соруйда диэн бүгүн киин куораттааҕы планеркаҕа иһитиннэрдилэр.

Дьокуускай опуобустарын пааркатыгар Volgabus мааркалаах 50 массыына эбиллиэҕэ. Итинтэн 44-дэ куоракка аҕалылынна, өссө иккитэ – Аллараа Бэстээххэ уонна түөрдэ – собуоттан  иһэр.

Мээр Евгений Григорьев оптуобустары регистрациялааһыны уонна хааччыйыыны түргэтэтэргэ соруйда. Саҥа оптуобустар тохсунньу бүтүүтэ – олунньу ый саҥатыгар маршруттарга тахсыахтара.

Санатан суруйдахха, 2026 сыл тохсунньу 1 күнүттэн Дьокуускайга уопсастыбаннай тырааныспарынан айаннааһын сыаната уларыйда. Билигин куорат устун оптуобуһунан айаннааһын уу харчынан уонна баан каартатынан — 58 солкуобай, “Спутник” каартанан – 46 солкуобай. Куорат таһынааҕы хайысхаларга тарыып 100 солк. тиийдэ.