Дьокуускайга куоскалар чумаалаатылар

Дьокуускай куорат Автодорожнай уулуссатыгар биир дьиэҕэ подъезка баар куоскалар чумаанан ыалдьыбыттар. Бу туһунан  куоска хаһаайката айманан суруйбут. Кинилэр дьиэлэрин көрүдүөрдэригэр аҕыс куоска бэйдиэ сылдьарын кэпсээтэ.

Бу куоскалартан сылтаан дьиэтээҕи куоскатын чумаа ыарыыга сыһыарбыт. Хаһаайка тылыттан иһиттэххэ, куоската чумааттан быһыы ылбыта эбитэ үһү. Ол эрээри ыарыыга син биир хаптарбыт. Онон кыһалҕаттан куоскатын утутарга тиийбит. Бу кыһалҕа хайдах быһаарылларыттан долгуйар. Ыалдьыбыт куоскалары дьиэ подъеһыттан ким харайыахтааҕый?

СӨ Бэтэринээрийэтин департаменыгар сибээскэ тахсан подъезд олохтоохторо тугу гыныахтарын сөбүн туһунан ыйыталастыбыт:

— Дьиэ олохтоохторо  уокурук быраабатыгар кэлэктиибинэй суругу суруйан куоскалары туттарыахтарын сөп. Кыраапык быһыытынан, уокурукка рейдэлэр хас оптуорунньук ахсын буолаллар. Бу рейдэҕэ уокурук исписэлиистэрэ, полиция уонна биһиги департамеммыт иниспиэктэрдэрэ сылдьаллар. Ыксаллаах балаһыанньаҕа сайаапка төһө киирбитинэн көрөллөр.

Бэйдиэ ыт, куоска хантан кэлэрий? Кинилэр халлаантан түспэттэр. Барыта эппиэтинэһэ суох хаһаайыттартан маннык быһыы-майгы тахсар.